غزہ کی پٹی میں بیماریوں کے پھیلاؤ پر گہری تشویش ہے،اقوام متحدہ

اقوام متحدہ: عالمی ادارہ صحت نے اعلان کیا ہے کہ اسے غزہ کی پٹی میں بیماریوں کے پھیلاؤ پر گہری تشویش ہے۔

 جہاں ہفتوں سے جاری اسرائیلی بمباری کے باعث رہائشیوں کو خوراک اور صاف پانی کی شدید قلت کے ساتھ پناہ گاہوں میں شدید بھیڑ کا سامنا ہے۔ سعودی خبررساں ادارے کےمطابق فلسطینی علاقوں میں تنظیم کے نمائندے رچرڈ پیپر کارن نے کہا کہ ہم سردیوں کا موسم آنے پر بیماریوں کے پھیلاؤ کے بارے میں بہت فکر مند ہیں۔

انہوں نے مزید کہا کہ گنجان آباد علاقے میں شدید سانس کے انفیکشن کے 70,000 سے زیادہ کیسز اور ڈائریا کے 44,000 سے زیادہ کیسز کی نشاندہی کی گئی، یہ تعداد توقع سے کہیں زیادہ ہے۔اقوام متحدہ کے ورلڈ فوڈ پروگرام نے اطلاع دی ہے کہ غزہ کی پٹی کو “بڑے پیمانے پر قحط” اور خوراک کی قلت کا سامنا ہے۔ پٹی کے تقریباً تمام باشندوں کو خوراک کی امداد کی اشد ضرورت ہے۔

فوڈ پروگرام نے ایک بیان میں اشارہ کیا ہے کہ 7 اکتوبر کو لڑائی کے آغاز سے لے کر اب تک صرف 10 فیصد ضروری اشیائے خوردونوش غزہ میں داخل ہوئی ہیں اور متعدد باشندے زندہ رہنے کے لیے دن میں صرف ایک وقت کا کھانا کھاتے ہیں۔