سوڈان کی وزیر خارجہ کا وزیر خارجہ شاہ محمود قریشی کیساتھ ٹیلی فونک رابطہ

تفصیلات کے مطابق سوڈان کی وزیر خارجہ مریم الصادق المہدی نے وزیر خارجہ مخدوم شاہ محمود قریشی کے ساتھ ٹیلیفونک رابطہ کیا ہے۔جس میں اسرائیلی جارحیت اور فلسطین کی صورتحال سمیت باہمی دلچسپی کے امور پر تبادلہ خیال کیا گیا ہے۔دونوں وزرائے خارجہ کیجانب  سے نہتے فلسطینیوں پر جاری اسرائیلی حملوں کی شدید مذمت بھی کی گئی۔

وزیر خارجہ شاہ محمو د قریشی نے کہا کہ  اسرائیلی فوج کی جانب سے مظلوم فلسطینیوں پر جاری مظالم، بین الاقوامی قوانین کی صریحاً خلاف ورزی اور انسانی حقوق کی علمبردار قوتوں کیلئے لمحہ فکریہ ہیں ، وزیر خارجہ نے سوڈانی ہم منصب کو، فلسطینیوں پر جاری اسرائیلی مظالم رکوانے اور عالمی برادری کی توجہ مبذول کروانے کیلئے، پاکستان کی جانب سے کی جانے والی سفارتی کاوشوں سے آگاہ کیا۔

وزیر خارجہ کا کہنا تھا کہ  مسئلہ فلسطین کے حوالے سے پاکستان، کا موقف واضح اور دو ٹوک ہے، پاکستان، فلسطینیوں کی حق ارادیت کی جدوجہد کی حمایت جاری رکھے گا،وزیر اعظم عمران خان نے فلسطینی صدر کیساتھ ٹیلیفونک رابطے میں، فلسطین کی صورتحال پر تشویش کا اظہار کرتے ہوئے پاکستان کی جانب سے مکمل حمایت کا یقین دلایا ہے۔ میرا کل فلسطین کے وزیر خارجہ سے رابطہ ہوا اور میں نے انہیں فلسطین کے معاملے پر پاکستان کی جانب سے کی جانیوالی سفارتی کاوشوں سے آگاہ کیا ہے۔

دونوں وزرائے خارجہ نے مسئلہ فلسطین کے پرامن حل اور اسرائیلی جارحیت کی روک تھام کیلئے عالمی فورمز پر مشترکہ کاوشیں بروئے کار لانے پر اتفاق کیا ہے۔