مشہور کردار انکل سرگم کے خالق فاروق قیصر کو سپرد خاک کردیا گیا

تفصیلات کے مطابق  نامور مزاح نگار، کارٹونسٹ اور شاعر فاروق قیصر کو اسلام آباد میں سپرد خاک کردیا گیا ہے ۔  فاروق قیصر کی نمازِ جنازہ اسلام آباد کے ایچ الیوان قبرستان میں ادا کی گئی ، نماز جنازہ میں سیاسی ، سماجی اور شوبز سے منسلک شخصیات نے بڑی تعداد میں شرکت کی۔

نماز جنازہ میں شریک آئی جی موٹروے کلیم امام، فرحت اللہ بابر، میاں اسلم اور فنکار مسعود خواجہ نے فاروق قیصر کو خراج عقیدت پیش کیا اور کہا کہ مرحوم نے ہر دلعزیز كردار "انکل سرگم" سے اہم سماجی مسائل کو اُجاگر کیا، فاروق قیصر کے جانے سے پاکستان میں شعبہ فن کا اہم باب بند ہوگیا۔

خیال رہے کہ پچھتر سالہ فاروق قیصر جمعے کی شب اسلام آباد میں حرکتِ قلب بند ہونے سے انتقال کر گئے تھے، ان کے سوگواران میں ایک بیٹا اور دو بیٹاں شامل ہیں۔

مرحوم کے نواسے حسنین قیصرکا کہنا تھاکہ  فاروق قیصرکافی عرصے سےعارضہ قلب میں مبتلا تھے، ایک گھنٹہ پہلےنانا کی طبیعت خراب ہوئی، اسپتال لے جانے کے لیے ایمبولینس بلائی مگر ان کا پہلے ہی انتقال ہوگیا۔