نگران وفاقی وزیر داخلہ سرفراز احمد بگٹی سے چینی سفیر جیانگ ژائی ڈانگ نے ملاقات

نگران وفاقی وزیر داخلہ سرفراز احمد بگٹی سے چین کے سفیر جیانگ ژائی ڈانگ نے ملاقات کی جس میں دوطرفہ تعلقات سمیت باہمی دلچسپی کے امور پر تبادلہ خیال کیا گیا۔

نگران وفاقی وزیر داخلہ سرفراز احمد بگٹی نے کہا کہ پاکستان اور چین کے درمیان کئی دہائیوں پر مشتمل دوستی دنیا بھر کے لئے مثال ہے۔ انہوں نے وزیراعظم پاکستان انوارالحق کاکڑ کے کامیاب دورہ چین کاذکر کرتے ہوئے کہا کہ اس دورہ سے سکیورٹی سمیت مختلف شعبوں میں تعاون مزید مضبوط ہو گا، ہمارااگلا ہدف دورے کے دوران کئے گئے معاہدوں کو عملی جامہ پہنانا ہے۔

انہوں نے چینی صدر شی جن پنگ کے گلوبل سکیورٹی انیشی ایٹیو کو سراہتے ہوئے کہا کہ گلوبل سکیورٹی کو بڑھانے کیلئے پاکستان ہر قسم کے بین الاقوامی تعاون میں فعال کردار ادا کرنے کو تیار ہے ۔

سرفراز بگٹی نےکہا کہ چینی شہریوں کی سکیورٹی کو یقینی بنانے کیلئے ہر ممکن اقدامات کئے گئے ہیں۔چینی سفیر نے چینی باشندوں کو ہر ممکن سکیورٹی فراہم کرنے پر وزیر داخلہ کا شکریہ ادا کیا۔ دہشت گردی ایک چیلنج ہے مگر ہم نے اسے پہلے بھی شکست دی ہے اور اس مرتبہ بھی اس کا مکمل خاتمہ کریں گے۔

چینی سفیر نے دہشت گردی کے خلاف جنگ میں پاکستان کے کردار کو بھی سراہا۔ ملاقات میں سکیورٹی کے شعبے میں تعاون کو مزید آگے بڑھانے پر اتفاق کیا گیا۔