پارلیمنٹ حملہ کیس: تفتیشی افسر نے اسد عمر کے خلاف کیس واپس لے لیا

پی ٹی وی اور پارلیمنٹ حملہ کے کیس میں تفتیشی افسر نے سابق وفاقی وزیر اسد عمر کے خلاف مقدمہ واپس لے لیا۔ اسلام آباد کی سیشن عدالت نے تفتیشی افسر کے بیان کی روشنی میں اسد عمر کی درخواست ضمانت نمٹا دی۔

اسلام آباد کی ڈسٹرکٹ اینڈ سیشن کورٹ کے جج عبدالغفور کاکڑ نے سابق پی ٹی آئی رہنما اسد عمر کے خلاف پی ٹی وی اور پارلیمنٹ حملہ کیس کی سماعت کی، وکلا صفائی اور تفتیشی افسرعدالت میں پیش ہوئے۔

دوران سماعت تھانہ سیکرٹریٹ کی پولیس نے سیشن عدالت میں اہم بیان دے دیا، تفتیشی افسر نے کہا کہ اسد عمر کی مقدمہ میں گرفتاری مطلوب نہیں ہے۔

پولیس بیان کے بعد اسد عمر کے وکلا سردار مسعود، آمنہ علی نے درخواست ضمانت واپس لے لی، عدالت نے تفتیشی افسر کے بیان کی روشنی میں اسد عمر کی درخواست ضمانت نمٹا دی۔