تمام صوبوں میں وسائل کی یکساں تقسیم کریں گے ،انوارلحق کاکڑ

نگران وزیراعظم انوار الحق کاکڑ نے کہا ہے کہ تمام صوبوں میں وسائل کی مساوی تقسیم یقینی بنانا وفاق کی ذمہ داری ہے۔

 بدھ کے روز اسلام آباد میں خیبرپختونخوا میں توانائی کے شعبے میں اصلاحات اور دہشتگردی کے خلاف جنگ کے شہداء کے لواحقین کی فلاح وبہبود کے بارے میں ایک اجلاس کی صدارت کرتے ہوئے کہا کہ کسی صوبے سے نا انصافی نہیں کر سکتے ۔

انہوں نے اس موقع پر کہا کہ وفاقی حکومت خیبرپختونخوا سمیت تمام صوبوں کے لوگوں کے حقوق کا تحفظ یقینی بنائے گی۔

انوار الحق کاکڑ نے واپڈا حکام کو خیبرپختونخوا کو پن بجلی کے خالص منافع کی ادائیگیوں کی راہ میں حائل تمام رکاوٹیں ترجیحی بنیادوں پر دور کرنے کی ہدایت کی۔

وزیراعظم نے کہا کہ ملک میں آبی ذخائر اور پن بجلی منصوبوں کی تعمیر ترجیحی بنیادوں پر مکمل کرنی چاہیے۔انوار الحق کاکڑ نے کہا کہ بہتر آبپاشی اور سستی اور ماحول دوست بجلی پیدا کرنے کیلئے جاری منصوبوں میں تعطل نہیں پیدا ہونا چاہیے۔اجلاس کے دوران وزیراعظم کو ملک بھر خصوصا خیبرپختونخوا میں جاری پن بجلی منصوبوں اور آبی ذخائر کی تعمیر کے بارے میں بتایاگیا۔وزیراعظم کو خیبرپختونخوا میں امن وامان کی صورتحال کے بارے میں بھی بریفنگ دی گئی ۔انہوں نے انسداد دہشت گردی کیلئے خیبرپختونخوا کوفنڈز فوری طورپر جاری کرنے کی ہدایت کیانوارلحق کاکڑ نے کہاکہ شہداء کا فلاحی فنڈ شہدا کے لواحقین میں فوری طورپر تقسیم کیاجاناچاہیے ۔انہوں نے کہاکہ قوم دہشت گردی کے خلاف جنگ میں شہید ہونے والوں کے ورثاء کی مقروض ہے اور ان کی فلاح کیلئے مختص رقوم کی ادائیگی میں تاخیر برداشت نہیں کی جائے گی۔