اسرائیل فلسطین میں حالات مزید خراب کرنے سے باز رہے ، اوآئی سی قرارداد

غزہ کی صورتحال پر اسلامی تعاون تنظیم کا وزراء خارجہ کی سطح پر ہنگامی اجلاس  ہوا جس میں فلسطینیوں  پر مظالم کیخلاف  قرارداد منظور کرلی گئی ہے۔ قرار داد میں اسرائیل کے جارحانہ حملوں کی مذمت کی گئی ہے۔فلسطینیوں اور تمام امتِ مسلمہ کے مذہبی جذبات  کو ٹھیس پہنچانے اور اشتعال انگیزی  پر اکسانے  خطرات سے متعلق تنبیہ کی گئی ہے۔

قرارداد میں کہا گیا ہے کہ  اسرائیل  فلسطینیوں  کیخلاف تمام مظالم بند کرے۔فلسطینی زمینوں سے متعلق اسرائیل کی تیزی سے بدلتی پالیسی پر تشویش کا اظہار بھی کیاگیا ہے۔مشرقی بیت المقدس میں فلسطینیوں کو ان کے گھروں سے زبردستی نکالنے پر بھی تشویش کا اظہارکیاگیا۔

قرارداد میں اسرائیل کو فلسطینیوں کیخلاف تمام جرائم کا مکمل ذمہ دار ٹھہرایاگیا۔اسرائیل فلسطین میں حالات مزید خراب کرنے سے باز رہے۔ قرارداد میں بین الاقوامی کمیونٹی  سے اپنے وعدوں کی پاسداری کرنے پر زور دیاگیا ہے اور  قرارداد میں القدس کمیٹی کے سربراہ اور فلسطینیوں  کی ثابت قدمی کو بھی خراجِ تحسین پیش کیاگیا۔او آئی سی کے تمام رکن ممالک کو فلسطینیوں کی  ہر طرح کی مدد  کی فراہمی کی کال دی گئی ہے۔قرار داد میں مزید کہا گیا ہے  کہ اسرائیل بین الاقوامی  قانونی اقدامات کرتے ہوئےفلسطینیوں کو ان کےانفراسٹکرکچر کو پہنچنے والے نقصان کا ازالہ اداکرے۔

خیال رہے کہ گزشتہ کئی روز سے مسجد اقصیٰ اور غزہ میں اسرائیلی فوج کی جانب سے بمباری کی جارہی ہے۔ اسرائیلی حملوں میں اب تک تقریباً 181 فلسطینی شہید ہوچکے ہیں جبکہ 10 ہزار سے زائد افراد بے گھر ہوئے ہیں۔