روس نے میٹا کے ترجمان کو مطلوب افراد کی فہرست میں شامل کر لیا

سرکاری خبر رساں ایجنسی ٹاس (ٹی اے ایس ایس) کے مطابق روس نے میٹا پلیٹ فارمز کے ترجمان اینڈی سٹون کو غیر متعین اور نامعلوم الزامات پر مطلوب افراد کی فہرست میں شامل کر دیا ہے۔

ٹاس نے کہا کہ روسی وزارتِ داخلہ نے سٹون کے خلاف مجرمانہ تحقیقات شروع کر دی ہیں لیکن وزارت نے تفتیش یا الزامات کی تفصیلات ظاہر نہیں کیں۔ گذشتہ سال فروری میں یوکرین پر ماسکو کے حملے کے کچھ ہی دیر بعد میٹا کے اہم سوشل پلیٹ فارمز فیس بک اور انسٹاگرام پر روس میں پابندی لگا دی گئی تھی۔

مارچ 2022 میں روسی تحقیقاتی کمیٹی نے کہا اس نے میٹا کے ملازمین کے غیر قانونی اقدامات کے خلاف مجرمانہ تحقیقات شروع کر دی ہیں اور سٹون کا ذکر کرتے ہوئے کہا کہ انہوں نے اپنے پلیٹ فارمز پر روسی فوج کے خلاف تشدد کے مطالبات پر پابندی ختم کر دی تھی اور اس طرح وہ انتہا پسندانہ سرگرمیوں پر اکسانے کا سبب بن رہے تھے۔

رائٹرز نے سٹون اور میٹا سے معمول کے کاروباری اوقات کے علاوہ تبصرے کی درخواست کی جس پر میٹا کے پریس آفس نے جواب نہیں دیا۔