فلسطین اور اسرائیل کے درمیان دو ریاستی حل خطے میں دیرپا امن کا واحد راستہ ہے،جو بائیڈن

امریکی صدر جو بائیڈن کا کہنا ہے کہ دو ریاستی حل ہی فلسطینیوں اور اسرائیلیوں کے لیے طویل مدتی سلامتی کو یقینی بنانے کا واحد راستہ ہے۔

سوشل میڈیا پلیٹ فارم ایکس پر ایک بیان میں بائیڈن کا مزید کہنا تھا کہ امریکا دو ریاستی حل کے حصول کے لیے کوششیں ترک نہیں کرے گا۔ امریکا چاہتا ہے کہ اسرائیل اور فلسطینی دونوں یکساں آزادی اور وقار سے لطف اندوز ہوں۔

A two-state solution is the only way to guarantee the long-term security of both the Israeli and the Palestinian people.

To make sure Israelis and Palestinians alike can live in equal measures of freedom and dignity.

We will not give up on working toward this goal.

— President Biden (@POTUS) November 26, 2023

اس سے قبل بائیڈن کا کہنا تھا کہ غزہ میں انسانی بنیادوں پر جنگ بندی ساحلی پٹی میں مصیبت زدہ شہریوں کے لیے بڑی مقدار میں اضافی انسانی امداد بھیجنے کی اجازت دیتی ہے۔

امریکی صدر کا کہنا تھا کہ ہم نے لڑائی کے وقفے کے دوران غزہ میں امداد میں اضافے کے لیے فوری طور پر کام کیا ہے۔ ہم نے ہر روز تقریباً 200 امدادی ٹرک غزہ میں منتقل کیے ہیں، جو خوراک، پانی، ادویات، ایندھن اور کھانا پکانے والی گیس سے لدے ہیں۔

انہوں نے ایک بیان میں مزید کہا کہ ہم غزہ کو منتقل کی جانے والی انسانی امداد کی مقدار بڑھانے کے لیے لڑائی کے خاتمے کا بھرپور فائدہ اٹھا رہے ہیں۔ ہم ایک ایسے مستقبل کی تعمیر کے لیے اپنی کوششیں جاری رکھیں گے جس میں فلسطینی عوام امن اور وقار سے لطف اندوز ہوں۔

We have worked urgently to surge aid into Gaza during the pause in fighting.

We have moved approximately 200 aid trucks into Gaza each day – loaded with food, water, medicine, fuel, and cooking gas.

— President Biden (@POTUS) November 26, 2023

وائٹ ہاؤس کے ترجمان جان کربی نے کہا کہ واشنگٹن یقینی طور پر جنگ بندی میں مزید توسیع کی امید رکھتا ہے اور اس کا تعلق حماس کی جانب سے مزید یرغمالیوں کی رہائی سے ہے۔ امریکی صدر جو بائیڈن جنگ بندی اور اس کی توسیع پر مذاکرات میں بہت زیادہ مصروف تھے اور انہیں پیر کی صبح تازہ ترین پیش رفت سے آگاہ کیا گیا۔

خیال رہے کہ حماس اور اسرائیل کے درمیان گذشتہ جمعہ کے روز چار روزہ عارضی جنگ بندی پر اتفاق ہوا تھا۔ کل سوموار کو جنگ بندی میں مزید دو دن کی توسیع کی گئی ہے۔