بینظیر انکم سپورٹ پروگرام غریب طبقوں کی مدد اور تعاون کےلیےہے ،ڈاکٹر امجد ثاقب

پشاور : بے  نظیر انکم سپورٹ پروگرام (بی آئی ایس پی) کے چیئرمین ڈاکٹر محمد امجد ثاقب نے کہا ہے کہ معاشرے کے غریب طبقات کو مالی طور پر بااختیار بنانا بے نظیر انکم سپورٹ پروگرام پروگرام کا بنیادی مقصد ہے۔ بدھ کے روز اچینی پشاور میں بی آئی ایس پی آفس کے دورے کے موقع پر مستحقین سے گفتگو کرتے ہوئے ڈاکٹر امجد ثاقب نے کہا کہ حکومت مستحق اور ضرورت مند لوگوں کو سماجی اور معاشی تحفظ کے دائرے میں لانے کے لیے انہیں مالی امداد اور تعاون فراہم کرنے کے لیے پرعزم ہے۔

بی آئی ایس پی کے دفاتر کے دروازے معاشرے کے غریب طبقوں کی مدد اور تعاون کےلیے کھلے ہیں اور انہیں ریلیف فراہم کرنے کے لیے تمام دستیاب وسائل بروئے کار لائے جا رہے ہیں۔ ڈاکٹر امجد نے بی آئی ایس پی کے ملازمین کو ہدایت کی کہ وہ اپنے کام کو ہمدردی، نرمی اور رحمدلی کے ساتھ سرانجام دیں اور ضرورت مند خواتین کو باوقار طریقے سے مالی امداد کی فراہمی کو یقینی بنائیں۔ اس موقع پر چیئرمین بی آئی ایس پی نے ضرورت مند خواتین سے بات چیت کی، ان کے مسائل سنے اور عملے کو ان کی شکایات کو جلد از جلد حل کرنے کی ہدایت کی. انہوں نے کہا کہ احسان کا ہر عمل صدقہ کی صورت ہے اور غریبوں کی خدمت کرنا محض نوکری نہیں بلکہ ایک نیک مقصد ہے۔

ڈاکٹر امجد نے ملازمین کو ہدایت کی کہ وہ اپنے کاموں میں شفافیت اور کارکردگی کا اعلیٰ معیار برقرار رکھیں۔ چیئرمین بی آئی ایس پی نے مستحقین پر زور دیا کہ وہ اپنے بچوں کی تعلیم پر توجہ دیں اور انہیں پیشہ ورانہ مہارتیں فراہم کریں تاکہ وہ ملک کی ترقی کے عمل میں نمایاں کردار ادا کر سکیں۔ انہوں نے کہا کہ کاروبار کےلیے چھوٹے قرضے غریب لوگوں کو اپنے طرز زندگی کو بہتر بنانے اور معاشرے کی خوشحالی میں کردار ادا کرنے میں مدد فراہم کریں گے۔

 انہوں نے دفتر میں رجسٹریشن ڈیسک اور بینیفشری سروسز سنٹر سمیت مختلف حصوں کا دورہ کیا اور مستحقین سے خطاب کیا۔ انہوں نے ان کے مسائل سنے اور ان کے حل کےلیے موقع پر احکامات جاری کیے. ڈائریکٹر جنرل بی آئی ایس پی خیبرپختونخوا زہرہ اسلم نے بی آئی ایس پی کے چیئرمین کو خیبرپختونخوا میں بی آئی ایس پی کے آپریشنز، خدمات اور مستحقین کو فراہم کی جانے والی سہولیات کے بارے میں آگاہ کیا

۔