چیف جسٹس قاضی فائز عیسیٰ کی دوقیمتی سرکاری گاڑیاں واپس کرنے کی ہدایت

اسلام آباد: چیف جسٹس پاکستان جسٹس قاضی فائز عیسیٰ نےدو قیمتی سرکاری گاڑیاں واپس کر دیں جو چیف جسٹس پاکستان کے استعمال کے لیے مختص ہیں۔ رجسٹرار سپریم کورٹ نے اس حوالہ سے سیکریٹری کابینہ اور چیف سیکریٹری پنجاب کوبذریعہ خط آگاہ کیا ہے۔

رجسٹرار سپریم کورٹ نے اپنے مراسلہ میں کہا ہے کہ چیف جسٹس کے علم میں یہ بات آئی ہے کہ سپریم کورٹ نے چیف جسٹس کے استعمال کیلئے ستمبر 2020ء میں ایک لگژری کار خریدی جس کی مالیت 6 کروڑ 10 لاکھ روپے ہے۔ اسی طرح حکومت پنجاب نے بھی چیف جسٹس آف پاکستان کے استعمال کیلئے ایک لگژری گاڑی دی اور دونوں گاڑیاں جی او آر لاہور میں سپریم کورٹ ریسٹ ہاؤس میں کھڑی ہیں۔

خط میں کہا گیا ہے کہ قواعد کے مطابق چیف جسٹس اور ہر جج کو دو ،دو گاڑیاں دی گئی ہیں تاہم چیف جسٹس قاضی فائز عیسیٰ تو یہ لگژری گاڑیاں استعمال نہیں کر رہے ہیں ۔

رجسٹرارسپریم کورٹ نے اپنے خط میں مزید کہاہے کہ آئینی اور عوامی عہدیداروں کے استعمال میں قیمتی امپورٹڈ گاڑیاں قومی خزانہ پر غیر مناسب بوجھ ہیں۔ انہوں نے کہاکہ چیف جسٹس آف پاکستان جسٹس قاضی فائز عیسیٰ نےہدایت کی ہے کہ مذکورہ بالادونوں گاڑیاں فروخت کر کے ان سے حاصل ہونے والی رقم پبلک ٹرانسپورٹ پر خرچ کی جائے۔