اسرائیل فلسطین تنازعہ کے دوران غزہ میں اب تک 63صحافی جان کی بازی ہار گئے

صحافیوں کے تحفظ کے لئے کام کرنے والی بین الاقوامی تنظیم کمیٹی ٹو پروٹیکٹ جرنلسٹس (سی پی جے)نے کہا ہے کہ 7اکتوبر سے شروع ہونے والے اسرائیل فلسطین تنازعہ کے دوران غزہ میں اب تک 63صحافی مارے جا چکے ہیں۔

غیر ملکی خبر رساں ادارے نے تنظیم کی رپورٹ کے حوالے سے بتایا کہ حال ہی میں شہید ہونے والے صحافیوں میں القدس ٹی وی کے رپورٹر حسن فراج اللہ اور المجدات نیٹ ورک کی صحافی شیما الغزار بھی شامل ہیں۔

سی پی جے نے واضح کیا کہ 7 اکتوبر سے اب تک 56 فلسطینی میڈیا ورکرز، 4 اسرائیلی اور 3 لبنانی صحافی جان سے ہاتھ دھو بیٹھے ہیں جبکہ 11 صحافی زخمی ہوئے اور 3 لاپتہ ہیں۔

سی پی جے کے مشرق وسطی اور شمالی افریقہ کے پروگرام کوآرڈینیٹر شیریف منصور نے کہا کہ سی پی جے اس بات پر زور دیتا ہے کہ صحافی بحران کے وقت لوگوں کو تازہ ترین حالات سے آگاہ کرتے ہیں اور متحارب فریقین کی طرف سے انہیں نشانہ نہیں بنایا جانا چاہیے۔

فلسطینی صحافیوں کے سنڈیکیٹ نے اس سے قبل اطلاع دی تھی کہ غزہ میں اسرائیل کی فوجی کارروائیوں کے آغاز کے بعد سے اب تک 63 فلسطینی میڈیا کارکن شہید ہو چکے ہیں۔