کامیابی پاکستان کا مقدر ہے: آرمی چیف

راولپنڈی: چیف آف آرمی اسٹاف (سی او اے ایس) جنرل سید عاصم منیر نے جمعرات کو کہا کہ کامیابی پاکستان کا مقدر ہے۔

انٹر سروسز پبلک ریلیشنز (آئی ایس پی آر) کے مطابق آرمی چیف جنرل سید عاصم منیر نے پشاور کا دورہ کیا جہاں انہیں سیکیورٹی کی مجموعی صورتحال اور انسداد دہشت گردی آپریشنز پر بریفنگ دی گئی۔

آئی ایس پی آر نے بتایا کہ آرمی چیف کو غیر قانونی غیر ملکیوں کی وطن واپسی اور نئے ضم ہونے والے اضلاع میں سماجی و اقتصادی ترقی کی پیشرفت پر بھی بریفنگ دی گئی۔

عاصم منیر نے انسداد دہشت گردی کے مختلف آپریشنز میں بہادری کا مظاہرہ کرنے والے افسران اور جوانوں سے بھی ملاقات کی اور ان کی مثالی کارکردگی کو سراہا۔

اس موقع پر آرمی چیف جنرل سید عاصم منیر نے کہا کہ قوم کو مسلح افواج کی کارکردگی پر فخر ہے۔ پاک فوج خون کے آخری قطرے تک مادر وطن کی حفاظت کا فریضہ سرانجام دیتی رہے گی۔

آرمی چیف نے خیبرپختونخوا میں پہلی بار منعقد ہونے والی قومی ورکشاپ کے شرکاء سے خطاب بھی کیا۔