توشہ خانہ فوجداری کیس، بانی چیئرمین پی ٹی آئی کا سزا معطلی کی درخواست پر فیصلہ محفوظ

توشہ خانہ فوجداری کیس، اسلام آباد ہائیکورٹ نے بانی چیئرمین پی ٹی آئی عمران خان کی فیصلہ معطلی کی درخواست پر فیصلہ محفوظ کر لیا، عمران خان کی نا اہلی کا نوٹیفکیشن عدالت میں پیش کیا گیا۔

ہائیکورٹ میں توشہ خانہ فوجداری کارروائی کا کیس کا سیشن کورٹ کا مکمل فیصلہ معطل کرنے کی بانی پی ٹی آئی کی درخواست پر سماعت ہوئی۔

الیکشن کمیشن کے وکیل امجد پرویز ایڈووکیٹ نے لاہور ہائیکورٹ میں اِسی ریلیف کیلئے درخواست دائر ہونے کا اعتراض اٹھاتے ہوئے کہا کہ اس عدالت میں یہ درخواست قابلِ سماعت نہیں ہے۔ الیکشن کمیشن کا نا اہلی کا فیصلہ ٹرائل کورٹ کے فیصلے کے تناظر میں تھا

چیف جسٹس عامر فاروق نے ریمارکس دیئے کہ یہ کہہ رہے ہیں کہ ہم نے فیصلہ معطلی کی زبانی استدعا کی تھی۔ امجد پرویز نے موقف اختیار کیا کہ انہوں نے دلائل نہیں دیئے جو نظیریں پیش کی وہ سزا معطلی کی ہیں۔

انہوں نے کہا کہ 8 اگست کو اپیل اور سزا معطلی دائر ہوئی 28 اگست کو سزا معطلی کا فیصلہ آیا ، فیصلے کے ایک ماہ سات دن بعد پانچ اکتوبر کو فیصلہ معطلی کی متفرق درخواست دائر ہوئی ہے۔لاہورہائیکورٹ کےسنگل بینچ نے سماعت کرکے معاملہ 5 رکنی بینچ کو بھجوادیا ہے لہٰذا استدعا ہے کہ اِس عدالت میں یہ درخواست قابلِ سماعت نہیں۔

اس پر بانی پی ٹی آئی کے وکیل لطیف کھوسہ کا کہنا تھا کہ اپنے دلائل میں واضح کہا تھا سزا کے فیصلے کو بھی معطل کریں ہو سکتا ہے یہ بات تحریری طور پر درج کرنے سے رہ گئی ہو۔