پی ٹی آئی کی لیول پلیئنگ فیلڈ اور انتظامیہ کی پری پول دھاندلی پر سپریم کورٹ میں درخواست دائر

چئیرمین پاکستان تحریک انصاف نے انتظامیہ کی پری پول دھاندلی پر اور 8 فروری کے عام انتخابات میں لیول پلیئنگ فیلڈ حاصل کرنے کیلئے سپریم کورٹ میں پٹیشن داخل کر دی۔

تاہم پی ٹی آئی حلقوں کے مطابق چونکہ ہائیکورٹس سے پارٹی کے حق میں حکم جاری ہونے کا امکان نہیں اس لیے سپریم کورٹ میں درخواست دائر کی گئی ہے۔

جمعرات کو ہی پشاور ہائیکورٹ نے پی ٹی آئی کی انٹراپارٹی الیکشن اور بلے کے نشان سے متعلق ایک درخواست مختصر حکم کے ساتھ نمٹا دی جس میں معاملہ الیکشن کمیشن پر چھوڑ دیا گیا۔

چئیرمین پاکستان تحریک انصاف نے انتظامیہ کی پری پول دھاندلی پر سپریم کورٹ میں پٹیشن داخل کر دی pic.twitter.com/vASFnLzlxb

— PTI (@PTIofficial) December 21, 2023

سپریم کورٹ میں درخواست چئیرمین پی ٹی آئی بیرسٹر گوہر خان نے دائر کی۔ انہوں نے درخواست میں وفاق، الیکشن کمیشن اور چاروں حکومتوں کو فریق بنایا ہے۔

درخواست میں کہاگیا ہےکہ پی ٹی آئی کارکنوں کو ہراساں کرنے سے روکنے کے احکامات جاری کئے جائیں، پی ٹی آئی کو انتخابی عمل میں بلاتفریق شرکت کی اجازت کے احکامات دیئے جائیں۔سپریم کورٹ میں درخواست ایڈووکیٹ شعیب شاہین کی وساطت سے دائر کی گئی۔

یہ درخواست آئین کے آرٹیکل 184(3) کے تحت دائر کی گئی ہے جو عوامی مفاد سے متعلق ہے۔ شعیب شاہین نے امیدواروں کو ہراساں کرنے کیخلاف اور لیول پلینگ فیلڈ مہیا نہ ہونے پر الیکشن کمیشن میں بھی درخواست دائر کی۔ درخواست دائر کرنے کے بعد شعیب شاہین کا کہنا تھا کہ انہوں نے شواہد بھی جمع کرائے ہیں۔