طالبان حکومت کا پاکستانی بائیکرز کا پرتپاک خیرمقدم، کابل میں خصوصی تقریب

افغانستان میں طالبان حکومت نے پاکستان سے آنے والے بائیکرز کا گرمجوشی سے استقبال کیا۔

کابل میں افغان اولمپک جنرل ڈائریکٹریٹ کی جانب سے پاکستانی بائیکرز کے اعزاز میں ایک خصوصی تقریب کا انعقاد کیا گیا، جس میں 16 رکنی پاکستانی ٹیم شریک ہوئی۔ اس موقع پر افغان اولمپک کمیٹی کے سربراہ مولوی احمداللہ وثیق بھی موجود تھے۔

مولوی احمداللہ وثیق نے افغانستان کو ایک پرامن، مستحکم اور قدرتی حسن سے بھرپور ملک قرار دیتے ہوئے پاکستانی مہمانوں کو خوش آمدید کہا۔

افغان اولمپک کمیٹی کے مطابق پاکستانی سیاحتی ٹیم ملک کے قدرتی مناظر سے لطف اندوز ہونے کی غرض سے افغانستان آئی ہے۔

افغان وزارت داخلہ کے ترجمان کا کہنا ہے کہ حالیہ مہینوں میں غیرملکی سیاحوں کی بڑھتی ہوئی آمد، افغانستان میں سیکیورٹی کی بہتر ہوتی صورتِ حال کا مظہر ہے۔