اعظم نذیر تارڑ کی اپوزیشن کو مذاکرات کی نئی پیشکش، پی ٹی آئی کا سخت ردعمل

وفاقی وزیر قانون اعظم نذیر تارڑ نے ایک بار پھر اپوزیشن کو مذاکرات کی دعوت دیتے ہوئے کہا ہے کہ قانون سازی اور پارلیمانی ماحول کی بہتری کے لیے بات چیت ناگزیر ہے۔

قومی اسمبلی میں اظہار خیال کرتے ہوئے انہوں نے کہا کہ ایوان کو مؤثر اور فعال رکھنے، قانون سازی کو بہتر بنانے اور جمہوری اقدار کو فروغ دینے کے لیے اپوزیشن کا تعاون ضروری ہے۔ انہوں نے واضح کیا کہ یہ پیغام وزیرِ اعظم کی ہدایات کے مطابق دیا جا رہا ہے، اور حکومت کی جانب سے مذاکرات کی دعوت ایک بار پھر دہرا دی جاتی ہے۔

دوسری جانب، چیئرمین پی ٹی آئی بیرسٹر گوہر نے حکومت پر شدید تنقید کرتے ہوئے کہا کہ "ملک میں حکومت کا طرزِ عمل غیر جمہوری ہوتا جا رہا ہے اور ہماری جماعت کو دیوار سے لگایا جا رہا ہے۔"

انہوں نے دعویٰ کیا کہ پاکستان کے تمام صوبوں اور وفاقی دارالحکومت میں عوام نے عمران خان کی حمایت میں احتجاج کیا، لیکن حکومت اب بھی انتقامی اقدامات سے باز نہیں آ رہی۔

قومی اسمبلی میں اپنے خطاب کے دوران بیرسٹر گوہر نے کہا کہ پی ٹی آئی نے عام انتخابات میں 180 نشستوں پر کامیابی حاصل کی، مگر صرف 90 کے قریب نشستوں کا نوٹیفکیشن جاری کیا گیا۔

ادھر این اے 129 کے ضمنی انتخاب میں پی ٹی آئی رہنما حماد اظہر کے کاغذات نامزدگی پر اعتراض دائر کر دیا گیا ہے۔

اپوزیشن لیڈر عمر ایوب، زرتاج گل، جمشید دستی اور دیگر رہنماؤں کو غیر آئینی طریقے سے نااہل قرار دیا گیا، جس پر بھی پی ٹی آئی نے اعتراض اٹھایا ہے۔ پارٹی کا مؤقف ہے کہ الیکشن کمیشن کے پاس اس طرح کی نااہلی کا کوئی آئینی اختیار موجود نہیں۔

بیرسٹر گوہر نے مزید کہا کہ "ہم نے ہمیشہ 9 مئی کے واقعات کی مذمت کی ہے، ہمارا مقصد ملک میں جمہوریت کی بقا ہے، لیکن ہر محاذ پر ہماری آواز کو دبایا گیا۔"