گلوکارہ آئمہ بیگ کی شادی کی خبریں زیر گردش، دلہا کون؟

پاکستانی میوزک انڈسٹری کی معروف گلوکارہ آئمہ بیگ کے حوالے سے افواہیں گردش کر رہی ہیں کہ انہوں نے فیشن برانڈ کے مالک زین احمد سے شادی کر لی ہے۔

میڈیا رپورٹ کے مطابق آئمہ بیگ اور زین احمد کینیڈا میں رشتہ ازدواج میں منسلک ہوگئے ہیں۔اس حوالے سے سوشل میڈیا پر آئمہ بیگ اور زین احمد کی عروسی ملبوسات میں لی گئی  تصاویر بھی وائرل ہورہی ہیں۔

تصویر کے منظر عام پر آنے کے بعد جہاں مداحوں کی جانب سے مبارکباد کا سلسلہ جاری ہے، وہیں کئی صارفین اس بات پر سوالات اٹھا رہے ہیں کہ کیا واقعی یہ ممکن ہے؟تاہم  شادی کی تصدیق یا تردید کے  حوالے سے دونوں شخصیات کی جانب سے فی الحال کوئی باضابطہ بیان جاری نہیں کیا گیا ہے۔

واضح رہے کہ آئمہ بیگ نے پہلے اداکار شہباز شگری سے منگنی کی تھی۔ دونوں کی ملاقات فلم ‘پرے ہٹ لو’ کی شوٹنگ کے دوران ہوئی تھی اور کچھ عرصے تک تعلقات کے بعد انہوں نے منگنی کی تھی۔ لیکن ستمبر 2022 میں آئمہ بیگ نے شہباز شگری سے منگنی ختم ہونے کا اعلان کیا تھا۔

بعد ازاں، آئمہ بیگ اور فیشن برانڈ کے مالک زین احمد کے درمیان تعلقات کی خبریں سامنے آنے لگی اور دونوں کو مختلف عوامی مقامات پر ایک ساتھ بھی دیکھا جاچکا ہے۔