ٹی ٹوئنٹی رینکنگ جاری ، پاکستانی کھلاڑیوں کی دھوم،حسن نواز، صائم ایوب اور سفیان مقیم کی شاندار چھلانگ

انٹرنیشنل کرکٹ کونسل (آئی سی سی) نے ٹی ٹوئنٹی کھلاڑیوں کی رینکنگ جاری کر دی ہے جس میں کئی پاکستانی کھلاڑیوں نےنمایاں ترقی حاصل کی ہے۔  

بیٹرز کی رینکنگ میں بھارت کے ابھیشک شرما نے اپنی پہلی پوزیشن برقرار رکھی ہے، جب کہ آسٹریلیا کے ٹریوس ہیڈ دوسرے اور بھارت ہی کے تلک ورما تیسرے نمبر پر موجود ہیں۔

پاکستان کے حسن نواز نے 24 درجے ترقی کے بعد 30 ویں پوزیشن حاصل کی، جب کہ صائم ایوب نے 25 درجے بہتری کے ساتھ 38 ویں نمبر پر جگہ بنائی۔

دوسری طرف پاکستان کے اسٹار بیٹر بابراعظم کو 3 درجے تنزلی کا سامنا کرنا پڑا، جس کے بعد وہ اب 17 ویں نمبر پر پہنچ گئے ہیں۔
بھارت کے یشسوی جیسوال نے ایک درجہ ترقی پاتے ہوئے 10 ویں پوزیشن سنبھالی، جب کہ آسٹریلیا کے ٹم ڈیوڈ نے دو درجے بہتری کے بعد 16 ویں نمبر پر جگہ بنائی ہے۔

بولرز کی رینکنگ میں بھی پاکستانی کھلاڑیوں نے شاندار کارکردگی دکھائی ہے۔
نوجوان فاسٹ بولر سفیان مقیم نے 69 درجے لمبی چھلانگ لگاتے ہوئے 35 ویں نمبر پر رسائی حاصل کی، جب کہ محمد نواز نے 51 درجے بہتری کے بعد 56 ویں نمبر پر جگہ بنا لی۔