علیمہ خان کا دعویٰ: پولیس والے خود کہہ رہے تھے کہ وہ بانی کے ساتھ ہیں

اڈیالہ جیل کے باہر میڈیا سے گفتگو کرتے ہوئے بانی پی ٹی آئی عمران خان کی بہن علیمہ خان نے کہا کہ پولیس اہلکار خود آ کر کہہ رہے تھے کہ وہ بانی کے ساتھ کھڑے ہیں۔

انہوں نے بتایا کہ گزشتہ روز کراچی، لاہور اور پشاور میں لوگ سڑکوں پر نکلے، اور انہیں اڈیالہ جیل جانے سے روکا گیا۔ ان کے مطابق جیل روڈ پر 400 سے زائد پولیس اہلکار آنسو گیس لیے تعینات تھے۔

علیمہ خان نے کہا کہ عوام کے جذبے کا امتحان نہ لیا جائے، بلکہ حکومت کے خوف کو آزمایا جائے۔ انہوں نے مزید کہا کہ اگر ارکانِ اسمبلی کل نہیں آئے، تو آئندہ ضرور آئیں گے۔ ہمیں خوشی ہے کہ عوام اپنے حق کے لیے آواز بلند کر رہے ہیں۔

انہوں نے دعویٰ کیا کہ بانی پی ٹی آئی نے کہا ہے کہ ملک میں جھوٹی گواہیوں کی بنیاد پر سزائیں دی جا رہی ہیں۔

علیمہ خان کا کہنا تھا کہ توشہ خانہ ٹو کیس کا ٹرائل خفیہ طریقے سے چلایا جا رہا ہے، جو کہ ایک غیرمنصفانہ عمل ہے۔ ان کے مطابق حکومت چاہتی ہے کہ اس کیس میں بھی جلد از جلد سزا سنا دی جائے، حالانکہ منصفانہ ٹرائل میں وکلاء، میڈیا اور اہلِ خانہ کی موجودگی ضروری ہوتی ہے۔

انہوں نے مزید الزام عائد کیا کہ پی ٹی آئی کے کئی رہنماؤں کو نااہل کیا گیا اور متعدد کو سزائیں دی گئیں، جبکہ الیکشن کمیشن کو سب کو نااہل کرنے کی جلدی ہے۔

علیمہ خان نے یہ بھی کہا کہ اب 27ویں اور 28ویں آئینی ترامیم لائی جا رہی ہیں، اور مختلف افراد کو دھمکیاں دی جا رہی ہیں۔ ان کے بقول، انہیں خود بھی دھمکیاں موصول ہو رہی ہیں۔