دنیا بھر میں مقیم کشمیری یوم حق خود ارادیت منا رہے ہیں

کنٹرول لائن کے دونوں جانب اور دنیا بھر میں مقیم کشمیری آج '' یوم حق خود ارادیت'' اس عزم کے ساتھ منا رہے ہیں کہ وہ اپنے بین الاقوامی طورپر تسلیم شدہ ناقابل تنسیخ حق کے حصول تک اپنی جدوجہد جاری رکھیں گے۔

یوم حق خود ارادیت منانے کی اپیل کل جماعتی حریت کانفرنس نے کی ہے۔ اس دن بھارت کے غیر قانونی زیر قبضہ جموں و کشمیر ، آزاد جموں و کشمیر اور دنیا بھر کے ممالک کے دارالحکومتوں میں احتجاجی مظاہروں، ریلیوں، سیمیناروں اور کانفرنسوں کے انعقاد سمیت مختلف تقریبات منعقد ہوں گی۔

5جنوری1949ء کو اقوام متحدہ کی سلامتی کونسل نے ایک قرارداد منظور کی تھی جس میں اقوام متحدہ کی زیر نگرانی رائے شماری کے ذریعے کشمیریوں کا اپنے مستقبل کا فیصلہ کرنے کا حق تسلیم کیاگیاتھا۔ سات دہائیوں سے زائد عرصہ گزرنے کے باوجود اقوام متحدہ نے تیرہ اگست 1948ء اور پانچ جنوری 1949ء کی اپنی قراردادوں پر عملدرآمد کے حوالے سے کوئی ٹھوس اقدامات نہیں کئے۔

بھارت کے غیرقانونی زیرقبضہ جموں وکشمیر میں قابض بھارتی فوج کے جاری مظالم کی جانب دنیا کی توجہ مبذول کرانے کے لئے آج آزادکشمیر کے تمام اضلاع میں احتجاجی مظاہرے، جلوس، سیمینار اور دیگر پروگرام منعقد کئے جائیں گے۔مظفرآباد میں پاسبان حریت سمیت دوسری حریت پسند تنظیموں نے برہان وانی شہید چوک میں ریلی کا اہتمام کیا ہے۔ریلی کے شرکاء مظفرآباد میں اقوام متحدہ کے مبصر مشن کی طرف مارچ کریں گے۔