پاکستان نے غزہ کے مظلوم عوام کیلئے چوتھی کھیپ روانہ کر دی

پاکستان نے غزہ کے مظلوم عوام کیلئے بیس ٹن امدادی اشیاء کی چوتھی کھیپ روانہ کی ہے۔

یہ امدادی سامان پاک فضائیہ کی ایک خصوصی پرواز کے ذریعے نور خان ایئر بیس سے روانہ کیا گیا۔

نگران وزیر خارجہ جلیل عباس جیلانی، پاکستان میں فلسطین کے سفیر احمد ربیع، ہنگامی امدادی ادارے اور مسلح افواج کے حکام بھی ایئر بیس پر موجود تھے ، اس موقع پر گفتگو کرتے ہوئے جلیل عباس جیلانی نے فلسطینی عوام کی مکمل حمایت کا اظہار کیا۔

انہوں نے غزہ میں شہریوں بالخصوص خواتین اور بچوں کے خلاف طاقت کے اندھا دھند اور وحشیانہ استعمال کی شدید مذمت کی۔

وزیر خارجہ نے بین الاقوامی عدالت انصاف میں فلسطینی عوام کی نسل کشی کے مقدمے میں جنوبی افریقہ کی مکمل حمایت کا اعادہ بھی کیا۔

انہوں نے فوری طور پر جنگ بندی اور غزہ کے عوام کو انسانی بنیادوں پر امداد کی فوری فراہمی یقینی بنانے پر بھی زور دیا۔

اس موقع پر فلسطینی سفیر نے امدادی سامان فراہم کرنے پر حکومت پاکستان کا شکریہ ادا کیا۔

امدادی اشیاء کی چوتھی کھیپ میں جراحی اور طبی اشیائ، کھانے کی خشک چیزیں اور حفظانِ صحت کی کٹس سمیت ضروری اشیاء شامل ہیں۔