لالی وڈ کے سلطان  کہلائے جانے والے سلطان راہی کو دنیا سے رخصت ہوئے 30 برس بیت گئے

ویب ڈیسک: لالی وڈ کے سلطان اداکاری میں بے مثال ، فلم انڈسٹری کو طویل عرصہ کندھوں پر اٹھانے والی شخصیت، جنہیں سلطان راہی  کے نام سے یاد کیا جاتا ہے کو دنیا سےخصت ہوئے  30 برس بیت گئے۔

 1934میں راولپنڈی میں آنکھ کھولنے والے سلطان محمد سے متعلق کسی کو معلوم نہیں تھا کہ یہ  نوجوان  ایک  روز خون آلودہ گنڈاسوں اور گولیاں اگلتی کلاشنکوفوں سے بھرپور جدال و قتال  کی فلموں کا سپر اسٹار بنے گا۔

فلم ’’بابل‘‘ سے کیریئر کا آغاز کرنیوالے سلطان راہی   کو اصل شہرت مولا جٹ سے ملی، اس فلم نے باکس آفس پر تمام ریکارڈ توڑ ڈالے،آٹھ سو سے زائد  اردو اور پنجابی فلموں  میں اداکاری کرنیوالے اس عظیم فنکار کا نام گنیز بک آف ورلڈ ریکارڈ میں شامل ہے۔

 سلطان راہی کی معروف فلموں میں بشیرا، وحشی جٹ ، راکا، سخی بادشاہ، بابل اور دیگر شامل ہیں۔

سلطان راہی کے صاحبزادے  فلمسٹار حیدر سلطان ،ساتھی فنکار  اور کروڑوں چاہنے والے آج بھی ان کی کمی شدت سے محسوس کر رہے ہیں۔

جی این این کو دیئے گئے ایک خصوصی انٹرویو میں ان کے بیٹے حیدر سلطان راہی کا کہنا ہے کہ  حکومت کو چاہیے والد کے نام پر ایک روڈ بنا دے یا انڈر پاس کا نام ہی  انکے نام پر رکھ دیا جائے، کچھ اس طرح کیا جائے تاکہ نئی نسل کو معلوم ہو سکے۔

پاکستان فلم انڈسٹری کے اس عظیم فنکار کو نو جنوری 1996 کو گوجرانوالہ کے قریب قتل کر دیا گیا۔ جو آج تک ایک معمہ ہے۔

  سلطان راہی کی موت  لالی وڈ کیلئے ناقابل تلافی نقصان  ثابت ہوئی، فلموں میں انصاف دلانے والے کو قانون آج تک انصاف نہ دے سکا۔