چینی سکینڈل میں جہانگیرترین ملوث ہوئے تونہیں چھوڑوں گا، وزیر اعظم

تفصیلات کے مطابق وزیر اعظم عمران خان کی زیر صدارت کور کمیٹی کا اجلاس ختم ہوگیا۔  کور کمیٹی اجلاس میں وزیراعظم نے سیاسی صورتحال پر اظہار خیال کیا۔وزیر اعظم عمران خان نے کہا کہ  نو این آر او کی پالیسی پر کسی صورت سمجھوتہ نہیں کروں گا،حکومت جاتی ہے تو جائے کوئی غلط فہمی میں نہ رہے، مخالفوں کے ساتھ بھی زیادتی نہیں کی تو اپنوں کے ساتھ کیوں کریں گے۔

وزیر اعظم کا کہنا تھا کہ  حکومت کسی پریشرگروپ کے ہاتھوں بلیک میل نہیں ہوگی،قانون کی حکمرانی کو یقینی بنائیں گے، ہماری پوری سیاسی جدوجہد ہی قانون کی حکمرانی کے لیے تھی، ہم انصاف پر یقین رکھتے ہیں، کسی کے ساتھ زیادتی نہیں ہوگی، احتساب کا عمل بلاتفریق جاری رہے گا، اگرحکومت گرانا کسی کا مقصد ہے تو شوق پورا کر لے،  ہم کسی کی بلیک میلنگ میں آکر اپنے منشور سے پیچھے نہیں ہٹیں گے۔

کورکمیٹی اجلاس  میں  الیکشن کمیشن کے متنازعہ ٹویٹ کا بھی جائزہ لیا گیا۔کورکمیٹی ارکان کی الیکشن کمیشن کے ٹویٹ کی شدید مذمت کی۔کور کمیٹی نے مطالبہ کیا کہ  ٹویٹ کے ذمہ دارمجرم کونوکری سے نکالا جائے، ایسا ادارہ جس پرسوال اٹھتے رہے ہیں اسے محتاط ہونا چاہیے تھا،‎ ملوث عناصرکے خلاف فوری کاروائی عمل میں لائی جائے۔

کور کمیٹی اجلاس میں بلدیاتی انتخابات سے متعلق بھی اہم فیصلہ کیا گیا ہے۔خیبرپختون خواہ اور پنجاب میں بلدیاتی انتخابات اسی سال کروانے کا فیصلہ کیا گیا ہے۔وزیراعظم نے وزیراعلی پنجاب اور کے پی کے کو انتخابات کرانے کی ہدایت کر دی ہے۔

کور کمیٹی کو گروتھ 4 فیصد تک آنے،ترسیلات زر اور زرمبادلہ کے ذخائر بڑھنے پر ‏بریفنگ‎ ‎ دی گئی۔کور کمیٹی نے وزیر اعظم کی قیادت اورمعاشی پالیسیوں پراعتماد کا اظہار‎ ‎کیا ہے۔کورکمیٹی کا کہنا ہے کہ  معاشی اہداف میں کامیابیوں کو عوام میں اجاگر کیا جائے۔ ‎

مجموعی سیاسی صورتحال اور جہانگیر ترین کے معاملے پربھی کور کمیٹی کو بریفنگ‎ ‎دی گئی۔آزادکشمیر کے انتخابات کے حوالے سےامیدواروں کو ٹکٹ جاری کرنے سے قبل ہوم ‏ورک پر بریفنگ‎ ‎دی گئی۔

کور کمیٹی نے کہا کہ  آزادکشمیر کے انتخابات کے حوالے سے امیدواروں کاانتخاب میرٹ پر ہوگا۔کور کمیٹی نے بلدیاتی انتخابات کی تیاریاں شروع کرنے کی ہدایت کردی ہے۔وزیر اعظم عمران خان نے کہا کہ بلدیاتی الیکشن کے لیے ہرسطح کے  کارکنوں کو متحرک کیا جائے۔