پشاور ، شاپنگ سینٹر میں شارٹ سرکٹ، آتشزدگی سے لاکھوں روپے کا مال جل گیا

پشاور: پشاور کے علاقے صدر میں واقع شاپنگ سینٹر میں اچانک آگ بھڑک اٹھی جس سے کروڑوں روپے کا مال جل گیا، جب کہ چار گھنٹے گزرنے کے باوجود آگ پر قابو نہیں پایا جاسکا، فائر فائٹرز تاحال آگ بجھانے کی کوششوں میں مصروف ہیں۔

حکام کے مطابق پشاور کے شاپنگ سینٹر میں شارٹ سرکٹ کے باعث لگنے والی آگ پر قابو پانے کے لیے فائر بریگیڈ کی 26 سے زائد گاڑیاں اور 130 سے زائد فائر فائٹرز آگ بجھانے میں مصروف ہیں۔ جبکہ دیگر اضلاع سے بھی فائر فائٹرز اور فائر بریگیڈ کی گاڑیوں کی ٹیمیں طلب کر لی گئی ہیں۔

ریسکیو حکام کا کہنا ہے کہ آگ نے پورے پلازہ کو اپنی لپیٹ میں لے لیا ہے۔ دو منزلہ عمارت میں تقریباً 200 دکانیں ہیں۔ شاپنگ سینٹر میں بیٹریاں اور یو پی ایس پھٹنے سے آگ کی شدت میں اضافہ ہوگیا جس پر قابو پانے میں مشکلات کا سامنا ہے۔

حکام کے مطابق شاپنگ سینٹر کے قریب واقع گھروں کو خالی کرالیا گیا کیونکہ شاپنگ سینٹر میں بیٹریاں اور یو پی ایس پھٹنے سے آگ پھیل رہی ہے۔