پیرس میں پاکستانی سفارت خانے میں دیہی خواتین کی دستکاری اور انٹرپرینوئرز کے اعزاز میں فیشن شو کا انعقاد

پیرس: فرانس کے دارالحکومت پیرس میں پاکستانی سفارت خانے دیہی خواتین کی دستکاریوں اور انٹرپرینوئرز کے اعزاز میں فیش شو کا اہتمام کیا۔

پیرس میں پاکستانی سفارت خانے کی طرف سے جاری بیان کے مطابق معروف ڈیزائنر عمر منصور اور کاروان کرافٹس فاؤنڈیشن کے اشتراک سے منعقدہ فیشن شو ’’ثقافت سے لباس‘‘ میں فرانس میں پاکستان کے سفیر عاصم افتخار احمد نے مہمانوں کا خیرمقدم کیا اور ملکی ترقی اور پاکستان میں لاکھوں افراد کے خوابوں کی تکمیل میں دیہی خواتین بشمول دستکاروں اورانٹرپرینوئرزکے کردار پر روشنی ڈالی۔

عاصم افتخار نے کہا کہ پاکستان کی سرزمین کو تہذیب کا گہوارہ کہا جاتا ہے اور پاکستان رنگین، ورسٹائل اور صوفیانہ فنون اور دستکاری کا ایک بڑ ا اور بھرپور ورثہ رکھتا ہے۔پاکستانی سفیر نے’’ثقافت سے لباس‘‘کے سفر کو اجاگر کرتے ہوئے نے فیشن شو کے شراکت داروں کا تعارف کرایا اور کہا کہ کاروان کرافٹس فاؤنڈیشن پاکستانی خواتین کو بااختیار بنانے کے لئے کوشاں ہے۔

انہوں نے کہا کہ عمر منصور نے تخلیقی ڈیزائننگ اور اعلی ٰمعیار کے ذریعے نوجوان نسل کے وژن اور کام کو تبدیل کرنے کا بیڑا اٹھایا ہے۔ انہوں نے کہا کہ پاکستان میں فیشن ہمیشہ سے روایت اور جدیدیت کا دلکش امتزاج رہا ہے۔

پاکستانی سفیر نے اس موقع پر مہمانوں کو پاکستان کے ہاتھ سے بنے ہوئے کپڑوں اور ٹیکسٹائل کے بھرپور ورثے سے آگاہ کیا۔ انہوں نے کہا کہ پاکستانی فیشن ڈیزائنر پیچیدہ کڑھائی، بلاک پرنٹنگ، اجرک، پھولکاری ، چنری سازی اور رلی جیسی فنکارانہ تکنیکوں کو عصری ڈیزائنوں میں شامل کر کے انہیں ایک تازہ اور جدید رخ دے رہے ہیں۔

عاصم افتخار نے کہا کہ فیشن ایک فوری زبان ہے جس سے مختلف ثقافتوں کے درمیان رابطے میں مدد مل سکتی ہے۔فرانس اور پاکستان فیشن کے حوالے سے ایک دوسرے کے ساتھ جڑے ہوئے ہیں ، فرانس لباس کے فیشن کے حوالہ سے دنیا بھر کا مرکز ہے جبکہ پاکستان دنیا کے مشہور برانڈز کے لئے عمدہ لباس تیار کرتا ہے۔