سابق گورنر پنجاب پی ٹی آئی رہنما میاں اظہر ضمانت پر رہا

لاہور: پاکستان تحریک انصاف (پی ٹی آئی) کے رہنما اور سابق گورنر پنجاب میاں اظہر کو لاہور میں پولیس نے رہا کر دیا۔

پولیس کے مطابق پاکستان تحریک انصاف کے رہنما میاں اظہر کو ضمانت پر رہا کر دیا گیا ہے، پولیس حکام کا کہنا ہے کہ کسی کو بھی بغیر اجازت ریلیاں اور جلسے کرنے کی اجازت نہیں ہے۔

خیال رہے کہ پی ٹی آئی کے رہنما اور سابق وفاقی وزیر حماد اظہر نے سوشل میڈیا پر ایک بیان میں الزام عائد کیا تھا کہ ان کے والد اور سابق گورنر پنجاب 82 سالہ میاں اظہر کو این اے 129 میں جلسہ کرنے پر گرفتار کیا گیا ہے۔ لاہور۔

حماد اظہر نے لکھا کہ ان کے والد کو بزدل اور خوف زدہ حکومت کے حکم پر گرفتار کیا گیا۔

دوسری جانب وزیرآباد سے پنجاب اسمبلی کی نشست پر پی ٹی آئی کے حمایت یافتہ امیدوار چوہدری محمد یوسف کو بھی گرفتار کر لیا گیا۔

پولیس کا کہنا تھا کہ محمد یوسف 9 مئی کے مقدمات میں مطلوب تھا۔