اسرائیلی حملے جاری، خان یونس میں ملبے سے ایک خاندان کے 12 افراد کی لاشیں برآمد

اسرائیلی فوج نے جمعہ کی صبح غزہ کی پٹی کے جنوب میں واقع شہر رفح کے مشرقی علاقوں پر فضائی حملے ، ایک ہی خاندان کے 12 افراد شہید ہو گئے۔

غزہ میں وزارت صحت کے مطابق فضائی حملے میں ایک ہی خاندان کے 12 شہداء کی لاشیں ان کے گھر کے ملبے کے نیچے سے ملی ہیں، جنہیں اسرائیلی فوج نے خان یونس کا مرکز میں السکہ کے علاقے میں بمباری کا نشانہ بنایا تھا۔

اسرائیلی فوج مصر کی سرحد کے قریب جنوبی غزہ کی پٹی کے علاقے خان یونس سے رفح میں اپنی فوجی کارروائیوں کو منتقل کرنے کی تیاری کر رہی ہے۔ادھر غزہ کی پٹی میں فلسطینی وزارت صحت نے بتایا کہ گذشتہ 24 گھنٹوں کے دوران مختلف علاقوں میں مسلسل اسرائیلی چھاپوں کے نتیجے میں 105 فلسطینی جاں بحق ہوئے، جن میں اکثریت بچوں، خواتین اور بزرگوں کی تھی۔

انہوں نے مزید کہا کہ اسرائیلی فوج نے خان یونس میں واقع الامل اسپتال پر چھاپے اور دھاوا بولنا جاری رکھا ہوا ہے اور ناصر اسپتال کا محاصرہ کر رکھا ہے۔ اس کی فورسز نے طبی عملے، زخمیوں، بیماروں اور ہزاروں بے گھر افراد کو نشانہ بناتے ہوئے بمباری جاری رکھی ہوئی ہے جبکہ غزہ کے یورپی ہسپتال کے ارد گرد بمباری کی کارروائیوں کے نتیجے میں متعدد ہلاکتیں ہوئیں۔

وزارت نے تصدیق کی کہ اسرائیلی فوج نے خان یونس کے مرکز اور مغرب میں، بنی سہیلہ، عبسان ، مناطق معن، البطن السمین، النسماوی کے علاقوں میں درجنوں چھاپے مارے اور بمباری کی۔ قابض فوج نے خان یونس میں طیبہ ٹاورز کے محلے پر بمباری کی اور شہر کے وسط اور مغرب میں بھی گولہ باری کی۔