حکومت کا الیکشن ڈیوٹی سے غیر حاضر ملازمین کو گرفتار کرنے کا حکم

سجاول: حکومت نے 8 فروری کو ہونے والے عام انتخابات میں الیکشن ڈیوٹی سے غیر حاضر رہنے والے سرکاری ملازمین کو گرفتار کرنے کے احکامات جاری کر دیئے۔

تفصیلات کے مطابق سجاول کے حلقہ پی ایس 74 سے الیکشن ڈیوٹی سے غیر حاضر 300 سے زائد اہلکاروں کے وارنٹ گرفتاری جاری کر دیے گئے۔

ریٹرننگ افسران (آر اوز) نے سب انسپکٹر سجاول کو غیر حاضر ملازمین کو گرفتار کرکے پیش کرنے کا کہا ہے۔ میڈیکل آفیسرز، اساتذہ اور دیگر سرکاری ملازمین کے وارنٹ گرفتاری جاری کیے گئے ہیں۔

دوسری جانب سیہون سے 134 سرکاری ملازمین الیکشن ڈیوٹی سے غیر حاضر ہیں۔

آر او محمد علی نے کہا کہ غیر حاضر ملازمین کو گرفتار کر کے ڈیوٹی پر لایا جائے گا، ملازمین کی اکثریت نے حاضری کی یقین دہانی کرائی ہے۔