نو فروری سے نواز شریف بلٹ کے زور پر جیتنے کی کوششیں کر رہے ہیں، بابر اعوان

پاکستان تحریک انصاف کے رہنما بابراعوان نے کہا کہ نو فروری سے نواز شریف بلٹ کے زور پر جیتنے کی کوششیں کر رہے ہیں، عام انتخابات کو ملکی تاریخ کے متنازع ترین الیکشن ہیں۔

الیکشن کمیشن کے باہر میڈیا سے گفتگو میں بابراعوان کا کہنا تھا کہ یہ پاکستان کی تاریخ کے سب سے متنازع الیکشن ہوئے، دو سال تک پری پول دھاندلی ہوتی رہی پھر یحیی خان ماڈل آیا، ہم نے سرگودھا اور فیصل آباد سے امیدواروں کے نتائج کو چیلنج کیا ہے، ہمارے امیدوار ان تمام حلقوں میں جیتے ہیں، 179 نشستوں پر اکثریت میں ہیں۔

انہوں نے کہا کہ نواز شریف نو فروری سے اب تک بلٹ کے زور پر جیتنے کی کوشش کر رہے ہیں، بانی پی ٹی آئی الیکشن میں بھاری اکثریت سے جیتے ہیں، الیکشن میں ہم 179 حلقوں میں اکثریت پر ہیں۔ ہمیں مرکز، پنجاب اور خیبر پختونخوا می حکومت بنانے دی جائے اور بانی چیئرمین پی ٹی آئی کو فوری رہا کیا جائے۔

بابر اعوان کا مزید کہنا تھا کہ ہم 9 فروری کے فیصلے کو نہیں مانتے، آسٹریلیا ، امریکہ اور برطانیہ نے 9 فروری کو مسترد کیا ہے، بینگن جیت گیا لندن سے آیا شیر ہار گیا۔ ووٹ کی بے عزتی سے نواز شریف کو نہ ہی دربار ملے گا اور نہ ہی عزت۔