حکومت نے معیشت کی بحالی کیلئے تمام ممکنہ اقدامات کئے:نگران وزیراعظم

نگران وزیراعظم انوار الحق کاکڑ نے کہا ہے کہ حکومت نے اپنی مختصر مدت میں ملکی معیشت کی بحالی کیلئے تمام ممکنہ اقدامات کئے۔

وہ اسلام آباد میں پاکستان ایسوسی ایشن آف لارج سٹیل پروڈیوسرز کے وفد سے گفتگو کر رہے تھے۔ انہوں نے کہا کہ حکومت نے برآمدات ٹیکس محصولات اور روزگار کے مواقع بڑھانے کے حوالے سے نجی شعبے کو سہولیات فراہم کرتے ہوئے کاروبار کیلئے سازگار ماحول پیدا کرنے کے اقدامات کئے ہیں۔ وزیراعظم نے کہا کہ خصوصی سرمایہ کاری سہولت کونسل کے تحت کئے گئے تمام اقدامات کے مثبت نتائج حاصل ہو رہے ہیں۔

انہوں نے کہا کہ کاروباری برادری اور سرمایہ کاروں نے ہر مشکل وقت میں پاکستان کی مدد کی، انہوں نے سٹیل کی صنعت سے منسلک کمپنیوں سے کہا کہ ملک میں لوہے کے نئے ذخائر کی ترقی کیلئے سرمایہ کاری کو ترجیح دیں۔

وزیراعظم نے متعلقہ محکموں کو ہدایت کی کہ سٹیل کی صنعت سے متعلقہ تمام مسائل ترجیحی بنیادوں پر حل کریں۔سٹیل کی پیداواری صنعتوں کے وفد نے ملک میں سرمایہ کاری کی سہولت دینے خصوصا صنعت کاروں کے مسائل حل کرنے اور ایف بی آر میں اصلاحات کرنے پر نگران حکومت کی کوششوں کی تعریف کی۔