لینڈ سلائیڈنگ: قراقرم ہائی وے ایک بار پھر بلاک

اپر کوہستان: بالائی کوہستان کے علاقے بھاشا کے مقام پر لینڈ سلائیڈنگ کے باعث شاہراہ قراقرم ایک بار پھر بند ہو گئی جس سے گاڑیوں کی قطاریں لگ گئیں اور بڑی تعداد میں مسافر پھنس گئے۔

اس سے قبل شاہراہ قراقرم پر موسلا دھار بارش اور برف باری کے باعث نو مقامات پر سڑک بلاک ہوگئی تھی جس کے نتیجے میں شاہراہ پر 1055 مسافروں کو لے جانے والی 95 گاڑیاں پھنس گئی تھیں۔

شدید بارش اور برف باری کے بعد شاہراہ قراقرم پر ریسکیو آپریشن کرتے ہوئے پاک فوج کے جوانوں نے پھنسی تمام گاڑیوں اور مسافروں کو بحفاظت نکال لیا۔

ریسکیو آپریشن کے دوران پاک فوج نے ڈیم سائٹ ایریا اور بشیداس کیمپ کے قریب پھنسے ہوئے 80 سے زائد مسافروں کو کھانا بھی فراہم کیا جس کے بعد تمام گاڑیوں اور مسافروں کو بحفاظت نکال لیا گیا۔