پی ڈی ایم کا مستقبل ، شہبازشریف اور مولانا فضل الرحمٰن کی آج اہم ملاقات

تفصیلات کے مطابق ملاقات مولانا فضل الرحمان کی رہائش گاہ پر ہوگی ، پی ڈی ایم سربراہ شہباز شریف کو عشائیہ بھی دینگے۔ ن لیگ کے سینیئر رہنما بھی قومی اسمبلی میں اپوزیشن لیڈرشہباز شریف کے ساتھ ہونگے۔ملاقات میں سیاسی صورتحال اور پی ڈی ایم سے متعلق امور پر تبادلہ خیال ہوگا۔ ذرائع کے مطابق شہبازشریف پیپلز پارٹی اور اے این پی کو پی ڈی ایم میں شامل کرنے سے متعلق اپنی تجاویز دینگے۔اس حوالے سے مسلم لیگی رہنما شہباز شریف دونوں جماعتوں کے رہنماؤں سے ہونے والے رابطوں کے بارے میں پی ڈی ایم کے سربراہ کو آگاہ کرینگے اور مسلم لیگ ن کے قائد نواز شریف کا پیغام بھی پہنچائیں گے۔

اس سے قبل ایک انٹرویو میں  صدر مسلم لیگ ن اور اپوزیشن لیڈر قومی اسمبلی شہباز شریف   کاکہنا تھا کہ سیاسی جماعتوں کےسربراہوں کے رشتوں میں اتار چڑھاؤ  آتے رہتے ہیں۔سیاسی جماعتوں کے اتحاد بنتے اور ٹوٹتے رہتے ہیں، کوئی ایک جماعت کسی کو نکالنے یا رکھنے کی مجاز نہیں ہے۔ اتحاد ماضی میں بھی بنتے رہیں اور ٹوٹتے رہے،9 ستاروں کا بھی اتحاد بنا،پی ڈی ایم میں 10 پارٹیاں ہیں، مشاورت سے تمام فیصلے ہوتے ہیں۔

واضح رہےکہ پی ڈی ایم کا  سربراہی اجلاس کل ہورہا ہے اس حوالے  سے  اس ملاقات کو اہم  خیا ل کیا   جارہا ہے۔