صدر مملکت نے قومی اسمبلی کا اجلاس طلب کرنے کی سمری مسترد کردی

صدر مملکت عارف علوی نے قومی اسمبلی کا اجلاس طلب کرنے کی سمری مسترد کردی۔

ایوان صدر کے ذرائع کےمطابق  صدر نے سمری اعتراضات لگا کر واپس بھجوا دی ۔صدر نے سمری پر اعتراض عائد کیا کہ پہلے خواتین اور اقلیتوں کی مخصوص نشستیں مکمل کی جائیں  ابھی ہاؤس مکمل نہیں، اجلاس نہیں بلایا جا سکتا۔ ہاؤس مکمل ہونے کے بعد قومی اسمبلی کا اجلاس بلایا جائے۔ صدر مملکت نے  سمری وزیراعظم  ہاؤس  اور وزارت پارلیمانی امور کو واپس بھجوا دی۔

نگران وزیراعظم انوار الحق کاکڑ نے 26فروری کو صبح دس بجے قومی اسمبلی کا اجلاس بلانے کے لیے سمری صدر مملک عارف علوی کو ارسال کی تھی۔ آئین پابند کرتا ہے کہ انتخابات کے 21 دن کے اندر اجلاس لازمی بلایا جائے اور آئین کے تحت قومی اسمبلی کا اجلاس 29 فروری کو لازمی بلا نا پڑے گا۔

جبکہ قومی اسمبلی سیکرٹریٹ کے ذرائع کے مطابق  قومی اسمبلی کا افتتاحی اجلاس 29 فروری کو طلب کرنے کا فیصلہ کیا گیا ہے ،آئین کے آرٹیکل 91 کی کلاز ٹو کے مطابق قومی اسمبلی کا اجلاس 29 فروری کو طلب کرنے کا فیصلہ کیا گیا ہے۔

اسپیکر قومی اسمبلی راجہ پرویز اشرف نے قومی اسمبلی سیکرٹریٹ کے اعلی افسروں  اور آئینی ماہرین سے مشاورت کی ,صدر مملکت ڈاکٹر علوی کی جانب سے سمری پر دستخط نہ کرنے سے پیدا شدہ صورتحال کا جائزہ لیا گیا ،آئینی ماہرین نے رائے دی کہ صدر کے سمری پر دستخط نہ کرنے سے قومی اسمبلی کے اجلاس میں طلبی میں کوئی رکاوٹ نہیں ، صدر کا اختیار اکیسویں دن سے پہلے اجلاس طلب کرنے کا ہے ۔آئین کے مطابق ہر صورت انتخابات کے 21 روز بعد قومی اسمبلی کا افتتاحی اجلاس منعقد ہونا ہے ۔

قومی اسمبلی سیکرٹریٹ نے  فیصلہ کیا ہے کہ صدر کے سمری مسترد کرنے کے باوجود قومی اسمبلی کا اجلاس 29 فروری کو ہوگا ۔