پنجاب کے اسکولوں میں گرمی کی چھٹیاں کتنی ہونگی ؟؟

وزیر تعلیم پنجاب مراد راس نے میڈیا سے گفتگو کرتے ہوئے کہا ہے کہ  7 جون کو اسکول کھولنے جا رہے ہیں۔ جون سے پہلے  سب ٹیچرز کو ویکسین لگادی جائے گی۔انہوں نے کہا کہ  اساتذہ اور عملے کی ویکسی نیشن کا آغاز کردیا ہے، لاہور میں 16 ہزار ٹیچرز اور 4 ہزار نان ٹیچرز اسٹاف ہے جنہیں ویکسین لگائی جائے گی۔

مراد راس   کا میڈیا سے گفتگو کرتے ہوئےکہنا تھا کہ  طالب علموں  کا بہت نقصان ہوچکا ہے۔اس لیے  گرمیوں کی چھٹیاں کم سے کم کریں گے جو دو سے تین ہفتوں کیلئے ہوں گی۔

چند روز قبل  وزیر تعلیم پنجاب مراد راس  نے سات جون سے لاہور سمیت باقی  اضلاع میں تعلیمی ادارے کھولنے کا اعلان کیا تھا۔

سماجی رابطے کی ویب سائٹ ٹوئٹر پر ایک ٹویٹ میں وزیر تعلیم  پنجاب مراد راس نے کہا تھا  پنجاب کے بیس اضلاع میں تعلیمی ادارے کھولنے کے حوالے سے این سی او سی میں مشاورت ہوئی ، بیس اضلاع میں پچاس فیصد حاضری کی پالیسی پر عملدرآمد ہوگا ، گورنمنٹ کے ایس او پیز پر عملدرآمد کیا جائے۔

قبل ازیں  وزیر تعلیم شفقت محمود کی زیر صدارت بین الصوبائی وزرائے تعلیم اجلاس ہوا تھا،حکومت نے رواں سال کسی کو پروموٹ نہ کرنے کا فیصلہ کیا تھا۔حکومت نے ایس او پیز کے تحت ہر صورت امتحانات لینے کا فیصلہ کیا تھا۔