دہشت گر دی کے خلاف فوج کی خدمات ہمیشہ جاری رکھیں گے ، آرمی چیف

آرمی چیف جنرل عاصم منیر نے کہا ہے کہ دہشتگردی کیخلاف جنگ میں پاک فوج کے جوانوں نے بڑھ چڑھ کر حصہ لیا۔

پاک فوج کے شعبہ تعلقات عامہ (آئی ایس پی آر) کے مطابق ساتویں پاکستان آرمی ٹیمز اسپرٹ مقابلوں کی اختتامی تقریب ہوئی جس میں آرمی چیف جنرل عاصم منیر مہمان خصوصی تھے۔

آئی ایس پی آر کا کہنا ہے کہ مقابلوں میں امریکا، سعودی عرب، ترکی، قطر سمیت  15دوست ممالک کی ٹیمیں شریک ہوئیں جبکہ چین ،جرمنی ،انڈونیشیا سمیت 6ممالک کے مبصرین شامل تھے۔

آئی ایس پی آر کے مطابق مقابلوں کے شرکا نے 60گھنٹوں کی سخت پیٹرولنگ مشق میں حصہ لیا جبکہ پاک فوج کی 7 ٹیموں نے مقابلوں میں شرکت کی۔

آرمی چیف جنرل عاصم منیر نے مشقوں میں بہترین مہارتوں کے مظاہرےکی تعریف کرتے ہوئے کہا کہ ان مقابلوں سے ایک دوسرے کے تجربات سے سیکھنے کے مواقع ملتے ہیں، مشقوں سے پیشہ ورانہ فوجی اور حربی مہارتیں بہتر ہوتی ہیں۔ 

جنرل عاصم منیر نےیہ بھی کہا کہ ایسے مقابلے جوانوں کی صلاحیتوں کومزید بہتر بناتے ہیں، ایسی مشقیں پاک فوج کے کردار ،عزم اور قابلیت کاخاصا ہے، دہشتگردی کیخلاف جنگ میں پاک فوج کے جوانوں نے بڑھ چڑھ کر حصہ لیا۔