وزیر اعلیٰ خیبر پختونخوا علی امین خان گنڈاپور کی میزبانی میں گرینڈ جرگہ ہوا۔

 وفاقی وزیر داخلہ محسن نقوی نے جرگے میں وفاقی حکومت کی نمائندگی کی،گورنر خیبر پختونخوا فیصل کریم کنڈی بھی جرگے میں شریک ہیں، مختلف سیاسی جماعتوں سے تعلق رکھنے والے اراکین خیبر پختونخوا اسمبلی اور دیگر پارلیمنٹیرینز جرگے میں شریک ہوئے۔
 اس کے علاؤہ مختلف سیاسی جماعتوں کے قائدین نے جرگے میں اپنی اپنی جماعتوں کی نمائندگی کی، جرگے میں شریک نمایاں سیاسی شخصیات میں ایمل ولی خان، پروفیسر ابراہیم ، محسن داوڑ، میاں افتخار حسین محمد علی شاہ باچا، سکندر شیرپاؤ، سپیکر صوبائی اسمبلی بابر سلیم سواتی، خیبر پختونخوا اسمبلی میں اپوزیشن لیڈر ڈاکٹر عباد، وفاقی وزیر امیر مقام اور دیگر شامل تھے۔

 وزیر اعلیٰ علی امین گنڈاپور کا مزید کہنا تھا کہ مجھے امید ہے کہ اس جرگے کے ذریعے ہم درپیش مسئلے کے پر امن حل کے لئے راستہ نکالنے میں کامیاب ہونگے،کسی بھی مسئلے کا حل تصادم یا تشدد نہیں بلکہ مذاکرات ہی سے ممکن ہے، اس مقصد کے لئے ہم نے پشتون روایات کے مطابق آج یہ جرگہ منعقد کیا ہے، جرگے میں شریک تمام سیاسی قائدین کی آراء اور تجاویز کا بھر پور احترام کیا جائے گا۔

  جرگے سے وزیر اعلیٰ کے پی نے کہا کہ میری دعوت پر جرگے میں شرکت کرنے پر تمام پارلیمنٹیرینز اور سیاسی قائدین کا مشکور ہوں،اس جرگے کی قیادت کے لئے مجھ پر اعتماد کرنے پر بھی میں تمام پارلیمنٹیر ینز اور سیاسی قائدین کا شکریہ ادا کرتا ہوں، آج ہم سب سیاسی وابستگیوں سے بالاتر ہوکر صوبے میں امن کے لئے یہاں جمع ہوئے ہیں، شہری چاہے ان کا تعلق عام عوام سے ہو یا فورسز سے انکی جان و مال کا تحفظ ہماری اولین ذمہ داری اور ترجیح ہے۔

وفاقی وزیرخزانہ محمد اورنگزیب کا کہنا ہے کہ کچھ بھی ہو جائے ٹیکس فراڈ کی روک تھام کریں گے۔

  وفاقی وزیرخزانہ محمد اورنگزیب نے نیوز کانفرنس کرتے ہوئے کہا ہے کہ ملکی معیشت بہتری کی طرف جارہی ہے، شرح سود میں کمی سے صورتحال بہتر ہو رہی ہے۔

محمد اورنگزیب نے کہا کہ سیلز ٹیکس کے لیے 3 لاکھ کمپنیاں رجسٹرڈ ہیں، معاشی محاذ پر ہم بہترین پوزیشن میں ہیں، ہم درست سمت میں جا رہے ہیں، توانائی شعبے میں اصلاحات لارہے ہیں۔

انہوں نے کہا کہ چاہتے ہیں ٹیکس نیٹ بڑھانے کے لیے مختلف طبقات کو آن بورڈ لیا جائے، جی ڈی پی کو 13 فیصد سے اوپر لے جانا چاہتے ہیں، ایف بی آر میں بہتری کے لیے اقدامات کیے جا رہے ہیں۔ 

وفاقی وزیرخزانہ نے کہا کہ ٹیکسز میں لیکج کی روک تھام کر رہے ہیں، حکومت ٹیکس اصلاحات پر عملدرآمد تیز کررہی ہے، ٹیکس چوری روکنے کے لیے اقدامات کر رہے ہیں، پاکستان میں ٹیکسوں کا سارا بوجھ تنخواہ دار طبقے پر ہے۔

ملک بھر میں سونے کی قیمت میں مسلسل تیسرے روز کمی ریکارڈ کی  گئی ہے۔

آل پاکستان جیمز اینڈ جیولر ایسوسی ایشن کے مطابق ملک بھر میں فی تولہ سونے کی قیمت میں 500 روپے کی کمی کی گئی ہے  جسکے بعد سونے کی قیمت 2 لاکھ 71 ہزار 200 روپے ہوگئی ہے۔

ایسوسی ایشن کے مطابق اسی طرح 10 گرام سونے کا بھاؤ  429 روپے کم ہوکر 2 لاکھ 32ہزار 510 روپے ہے ، دوسری جانب اگر عالمی منڈی میں دیکھا جائے تو بازار میں سونے کا بھاؤ 4 ڈالر کم ہوکر 2613 ڈالر فی اونس ہو گیا ہے۔

آل پاکستان جیمز اینڈ جیولر ایسوسی ایشن کا مزید کہنا ہے کہ رواں ہفتے فی تولہ سونے کا بھاؤ 4300 روپے کم ہوا ہے جبکہ سونے کی عالمی قیمت رواں ہفتے 40 ڈالر فی اونس کم ہوئی ہے۔