فیصل آباد: معروف کامیڈین سردار کمال کی نماز جنازہ آج سہ پہر 3 بجے مدنی مسجد بٹالہ کالونی فیصل آباد میں ادا کی جائے گی۔ بعد از نماز جنازہ انہیں ماں بیٹا قبرستان میں سپرد خاک کردیا جائے گا۔

اہل خانہ کے مطابق اداکار کی میت فیصل آباد لائی گئی اور الائیڈ ہسپتال میں رکھی گئی ہے۔ان کے پسماندگان میں دو بیٹے، ایک بیٹی اور بیوہ ہیں۔

یاد رہے کہ سردار کمال دو روز قبل دل کا دورہ پڑنے سے اس دنیا سے کوچ کرگئے تھے۔

سردار کمال اپنی مزاحیہ اداکاری سے لاکھوں دلوں پر راج کرتے رہے۔

ان کی وفات پر پاکستانی شوبز انڈسٹری سمیت ان کے لاکھوں مداحوں نے گہرے دکھ کا اظہار کیا ہے۔

راولپنڈی : جماعت اسلامی کے زیر اہتمام راولپنڈی میں مقبوضہ فلسطین کی مزاحمتی تنظیم حماس کے سربراہ شہید اسماعیل ہنیہ کی غائبانہ نماز جنازہ ادا کی گئی۔

تفصیلات کے مطابق راولپنڈی کے لیاقت باغ میں جماعت اسلامی کا دھرنا آج بھی جاری ہے۔ لیاقت روڈ پر غائبانہ نماز جنازہ کے موقع پر خطاب کرتے ہوئے امیر جماعت حافظ نعیم الرحمان کا کہنا تھا کہ اسماعیل ہنیہ کے شہادت کی بھرپور مذمت کرتی ہے، سابق وزیراعظم فلسطین اتھارٹی اسماعیل ہنیہ کو شہید کر دیا گیا ہے، ہمیں تاریخ کا سبق یاد ہے حماس کی یہ تحریک کبھی رکے گی نہیں، ہمیشہ شہید ایک نئے انقلاب کا عنوان بن جاتا ہے۔

واضح رہے کہ  دھرنے کے مقام پر ہی اسماعیل ہنیہ کی غائبانہ نماز جنازہ  ادا کی گئی جس میں ہزاروں افراد نے شرکت کی۔ 

کراچی میں بھی جماعت اسلامی کے تحت اسماعیل ہنیہ کی غائبانہ نماز جنازہ ادا کی گئی۔

وزارت داخلہ کی منظوری کے بعد نیکٹا نے  حافظ گل بہادر گروپ اور مجید برگیڈ کو کالعدم قرار دے دیا۔

تفصیلات کے مطابق  دہشتگردی میں ملوث دو تنظیموں کو کالعدم قرار دے دیا گیا ہے،اس حوالے سے  نیشنل  کاؤنٹر ٹیررزم اتھارٹی ( نیکٹا ) کا کہنا ہے کہ وزارت داخلہ کی منظوری کے بعد دونوں جماعتوں کو نیکٹا کی جانب  سے کالعدم جماعتوں کی لسٹ میں ڈالا گیا۔

 نیکٹا کے مطابق حافظ گل بہادر گروپ  اور مجید برگیڈ کو کالعدم قرار دیا گیا ہے، دونوں جماعتوں کو 2 سال تک نگرانی کے بعد کالعدم قرار دیا گیا ہے۔