عطاء تارڑ کے الزامات جھوٹ کا پلندہ ہیں، ترجمان تحریک انصاف

وفاقی وزیر اطلاعات عطاء اللہ تارڑ کی پریس کانفرنس پردرعمل دیتے ہوئے  پاکستان تحریک انصاف کے ترجمان نے کہا کہ عطاء تارڑ کے الزامات جھوٹ کا پلندہ ہیں جس کو جماعت مسترد کرتی ہے۔

پارٹی ترجمان نے کہا کہ جعلی وزیر اطلاعات عطاء تارڑ کی پریس کانفرنس جھوٹ، لغویات، الزام تراشی اور بیہودگی کے مجموعے کے سوا کچھ نہیں، عوام کا مینڈیٹ چرا کر زبردستی ملک پر قابض ہونے والے دوسروں کو حب الوطنی کا درس دے رہے ہیں، پی ٹی آئی ملک کی سب سے بڑی اور مقبول ترین واحد جماعت ہے جو وفاق کی تمام اکائیوں کی نمائندگی کرتی ہے۔

عطا اللہ تارڑ کی پریس کانفرنس پر پاکستان تحریک انصاف کا ردعمل

تحریک انصاف نے عطا تارڑ کے الزامات جھوٹ کا پلندہ قرار دے کر مسترد کر دیے

جعلی وزیر اطلاعات عطا تارڑ کی پریس کانفرنس جھوٹ، لغویات اور الزام تراشی اور بیہودگی کے مجموعے کے سوا کچھ نہیں،

عوام کا مینڈیٹ چرا کر زبردستی…

— Tehreek-e-Insaf (@InsafPK) March 13, 2024

ترجمان کے مطابق تحریک انصاف کی طرف سے یورپی یونین کو نہ کوئی خط لکھا گیا ہے اور نہ ہی خط لکھنے کا کوئی ارادہ ہے، پی ٹی آئی اور بانی چیئرمین عمران خان کی اپنے خلاف بدترین انتقام کے سلسلے کے باوجود آئی ایم ایف پروگرام کی کامیابی کیلئے کاوشیں سب کے سامنے ہیں، ن لیگ کے تجربہ کار وزیر خزانہ اسحاق ڈار کی نااہلی اور ہٹ دھرمی آئی ایم ایف پروگرام کی تکمیل میں تاخیر کا سبب بنی جس کی گواہی ان کے اپنے لیگی وزراء دے چکے ہیں۔

ترجمان کا کہنا تھا کہ عمران خان اور تحریک انصاف کی منظوری کے بعد آئی ایم ایف کی جانب سے قرض کی دوسری قسط جاری کی گئی، ملک کو دیوالیہ کی دہلیز پر پہنچانے والے مجرموں کے گروہ کو ایک بار پھر عوامی منشاء کے برخلاف مسلط کر دیا گیا، پی ڈی ایم پارٹ ٹو کے تمام 'تجربہ کار' وزراء کا مقصد قومی فلاح نہیں بلکہ قومی خزانے سے اپنی تجوریاں بھرنا ہے۔

تحریک انصاف کےترجمان کا کہنا تھاکہ جاتی امرا کے درباری اپنی جی حضوری کے بدلے ملنے والی جعلی وزارتوں کے نتیجے میں ہوش و حواس کھو کر جھوٹ اور لغویات بکنے کا نیا سلسلہ شروع کر چکے ہیں، جعلی فارم 47 کی سرکار گھسی پٹی سیاست کی روایت ترک کر کے اپنی مختصر حکومت کا محور ملک و قوم کی فلاح و خوشحالی کو بنائیں تو ان کیلئے بہتر ہو گا، ترجمان تحریک انصاف