سائفر کیس میں بانی چیئرین پی ٹی آئی کو سزا سنانے والے جج 2 ماہ کی رخصت پر چلے گئے

سائفر کیس میں بانی چیئرین پی ٹی آئی عمران خان کو کو سزا سنانے والے جج ابوالحسنات ذوالقرنین 2 ماہ کی چھٹیوں پر چلے گئے، انسداد دہشت گردی عدالت کے جج ابوالحسنات ذوالقرنین کی رخصت کے باعث نئے جج  کی تعیناتی کا فیصلہ کیا گیا ہے۔

سائفر کیس میں سابق وزیراعظم و بانی پی ٹی آئی عمران خان کو سزا سنانے والے جج ابولحسنات ذوالقرنین 2 ماہ کی رخصت پر چلے گئے۔انسداد دہشتگردی عدالت کے جج ابولحسنات ذوالقرنین کی رخصت کے باعث نئے جج کی تعیناتی کا فیصلہ کیا گیا ہے۔ذرائع کے مطابق اسلام آباد ہائیکورٹ نے انسداد دہشتگردی عدالت کے نئے جج کی تعیناتی کے لیے وزارت قانون کو خط لکھ دیا۔

ذرائع کے مطابق انسداد دہشتگردی عدالت نمبر دو کے جج کی تعیناتی کے لیے وزارت قانون کو سمری بھجوا دی گئی۔ ایڈیشنل ڈسٹرکٹ اینڈ سیشن جج محمد علی وڑائچ کی تعیناتی کے لئے وزارت قانون کو لکھا گیا ہے۔

انسداد دہشتگردی عدالت کے جج ابولحسنات ذوالقرنین 26 اپریل تک رخصت پر ہیں۔ جج ابولحسنات ذوالقرنین کے پاس آفیشل سیکرٹ ایکٹ کی عدالت کا چارج بھی ہے۔

دوسری جانب دو سابق وزرائے اعظم کو سزائیں سنانے والے احتساب عدالت کے جج محمد بشیر بھی ریٹائرڈ ہوگئے۔جج محمد بشیر 13 مارچ 2012 کو احتساب عدالت میں تعینات ہوئے تھے، 12 سال تک بطور احتساب عدالت جج خدمات سر انجام دینے کے بعد ریٹائرڈ ہوگئے۔ جج محمد بشیر نے نواز شریف ، مریم نواز اور کیپٹن ریٹائرڈ صفدر کو سزائیں سنائیں۔

جج محمد بشیر نے بانی پی ٹی آئی عمران خان اور بشریٰ بی بی کو توشہ خانہ کیس میں سزا سنائی۔ جج محمد بشیر کے پاس صدر مملکت آصف علی زرداری کیخلاف کیسز بھی زیر سماعت رہے۔

جج محمد بشیر نے سابق وزرائے اعظم شاہد خاقان عباسی ، راجہ پرویز اشرف اور یوسف رضا گیلانی کیخلاف کیسز بھی سنے۔ جج محمد بشیر نے توشہ خانہ کیس کا فیصلہ سنانے کے بعد میڈیکل رخصت لے لی تھی۔