نیب ریفرنسز ،حسن اور حسین نواز کی آج حاضری سے استثنیٰ کی درخواست منظور

احتساب عدالت نے نیب ریفرنسز میں بریت کی درخواست پر حسن اور حسین نواز کی آج حاضری سے استثنیٰ کی درخواست منظور کرلی، عدالت نے ریفرنسز کا ریکارڈ جمع کرانے نیب کی وقت دینے کی استدعا بھی منظور کر لی۔

ایون فیلڈ، العزیزیہ اور فلیگ شپ ریفرنسز میں سابق وزیراعظم میاں نواز شریف کے صاحبزادے حسن نواز اور حسین نواز کی بریت کی درخواستوں پر سماعت احتساب عدالت کے جج ناصر جاوید رانا نے کی۔

دوران سماعت حسن نواز اور حسین نواز کے وکیل قاضی مصباح ایڈووکیٹ اور حسن و حسین نواز کے پلیڈر رانا عرفان عدالت میں پیش ہوئے۔ علاوہ ازیں نیب پراسیکیوٹر افضل قریشی، سہیل عارف اور عثمان مسعود بھی عدالت میں پیش ہوئے۔

سماعت کے دوران نیب کی جانب سے ریکارڈ جمع کروانے کے لیے وقت طلب کرلیا گیا، جس پر عدالت نے 19 مارچ تک کا وقت دے دیا۔ عدالت نے حسن نواز اور حسین نواز کی آج حاضری سے استثنیٰ کی درخواست منظور کرتے ہوئے آئندہ سماعت 19 مارچ تک ملتوی کردی۔