کشمیری صرف اپنی شناخت اورآزادی چاہتے ہیں :مشعال ملک کا یوم کشمیرپرپیغام

یوم یکجہتی کشمیر پر جی این این سے خصوصی گفتگو کرتے  ہوئے  کشمیری حریت رہنما یاسین ملک کی اہلیہ مشعال ملک نے    کہا  کہ   کشمیر کی مائیں بیٹیاں ، بزرگ اپنے جوانوں،بیٹوں  کو آزادی کیلئے قربان کرتے ہیں ، یہ ایک عظیم قربانی ہے  جب لوگ اپنی   جان دے کر اس جنگ کو نہتے لڑتے ہیں ، یہ جذبہ ہے جو انہیں ہارنے نہیں دیتا اور جب ایک قوم کے اندر موت سے ڈرنے کا خوف ختم ہوجاتا ہے  تو اس قوم کو کوئی بھی ہرا نہیں سکتا ۔

مشعال ملک نے کہاکہ پوری دنیا کے نوجوانوں کو کشمیری نوجوانوں کی طرح ہونا چاہئیے جو اتنے خطرناک  حالات میں پڑھائی بھی کررہے ہیں اور کرفیو ، شٹرڈاؤن ، لاک ڈاؤن  میں   بھی جب یونیورسٹیز بند ہوتی ہیں ،وہ  اس تحریک کی بھی قیادت کررہے ہوتے  ہیں ، وہ    علم  حاصل  کررہے ہیں اور زخم بھی کھا رہے ہیں ،شہیدوں کوبھی دفناتے ہیں اور بھارتی فوج کا مقابلہ بھی کر  رہے ہیں ۔مگر وہ جھکتے نہیں  ہیں ،ڈرتے نہیں اور اس جہد مسلسل میں بچے ،بوڑھے سبھی  نکلتے ہیں اور نڈر ہوکر بھارتی مظالم کا مقابلہ کرتے ہیں۔

اقوام متحدہ کی قرار ددوں  سے متعلق  سوال پر مشعال ملک کاکہنا تھا کہ ہم دنیا سے یہ پوچھنا چاہتےہیں کہ کیا ہمیں آزادی کا حق نہیں ، ہم اپنی وہ شناخت مانگ رہے ہیں جو  اقوام متحدہ نے 70سال پہلے  ہمیں دی ہے،  خود ہندوستان نے   اقوام متحدہ میں ہمیں حق دینے کا وعدہ کیا تھا  ۔ہم کسی سے کوئی مالی امداد نہیں  مانگ رہے ہم اپنا حق خودارادیت  مانگ رہے ہیں ۔

واضح رہے کہ  پاکستان سمیت دنیا بھر میں آج یوم یکجہتی کشمیر منایا جارہاہے ، اس دن  کا مقصد پاکستانی قوم کا کشمیری عوام کے اقوام متحدہ کی قراردادوں کے تحت اپنے ناقابل تنسیخ حق خودارادیت کے حصول کیلئے منصفانہ جدوجہد کی مکمل حمایت کا اظہار کرنا ہے ۔

خیال رہے کہ  مقبوضہ کشمیر میں اگست 2019 سے جاری  غیر انسانی لاک ڈاؤن  کو 550دن ہوگئے ہیں ،  5 اگست کو بھارت کی حکمراں جماعت بھارتیہ جنتا پارٹی (بی جے پی) کی جانب سے مقبوضہ کشمیر کی خصوصی حیثیت ختم کرنے سے قبل ہی وادی میں کرفیو نافذ کردیا گیا تھا جبکہ ہزاروں اضافی فوجی بھی یہاں تعینات کردی گئی تھی۔اس کے ساتھ ساتھ مقبوضہ جموں و کشمیر کی حریت رہنماؤں یاسین ملک، سجاد لون، عمران انصاری اور دیگر کو بھی گرفتار کرلیا گیا تھا۔