وزیر اعظم اور صدر سمیت دیگر سیاسی شخصیات کی قوم کو عید الفطر کی مبارکباد

ملک میں آج عید الفطر مذہبی عقیدت و احترام کے ساتھ منائی جا رہی ہے، وزیر اعظم اور صدر سمیت دیگر سیاسی شخصیات نے مختلف شہروں میں نماز عید ادا کی۔ 

وزیراعظم محمد شہباز شریف نے لاہور میں عید الفطر کی نماز ادا کی۔وزیراعظم نے ملک و قوم کی ترقی و خوشحالی اور امت مسلمہ کی یکجہتی کے لئے خصوصی دعا بھی کی۔ وزیراعظم آفس کے پریس ونگ کے مطابق نماز کی ادائیگی کے بعد وزیراعظم لوگوں سے عید ملے۔

شہباز شریف نے اس موقع پر گفتگو کرتے ہوئے کہا کہ عید خوشی کا تہوار ہے اس میں دیگر افراد کا خیال رکھیں اور ملک کی ترقی میں سب اپنا حصہ ڈالیں۔ انہوں نے مزید کہا کہ عہد کریں پاکستان کو ہم نے ترقی یافتہ ملک بنانا ہے، ایسے لوگوں کو ضرور یاد رکھیں جن کے پاس وسائل نہیں ہیں۔ فلسطین میں بے گناہ مسلمانوں کا خون بہہ رہا ہے، فلسطینی اور کشمیری بھائی آج ظلم براداشت کر رہے ہیں۔

صدر مملکت آصف علی زرداری نے نواب شاہ میں عید الفطر کی نمازادا کی اور ملک کی سلامتی، خوشحالی اور ترقی کےلئےدعائیں کیں۔صدر مملکت مسجد میں موجود لوگوں سے عید ملے اور انھیں عید کی مبارکباد بھی دی۔

وزیر اعلیٰ خیبر پختونخوا علی امین گنڈاپور نے عید الفطر کی نماز اپنے آبائی گاؤں ڈی آئی خان میں ادا کی۔ اس موقع پر ملک کی سلامتی اور خوشحالی، قومی یکجہتی اور امت مسلمہ کی اتحاد کے لئے خصوصی دعائیں کی گئیں۔

لیگی رہنما رانا ثناء اللہ نے عید کی نماز فیصل آباد میں ادا کی۔ اس موقع پر انہوں نے پیغام دیا کہ سب کو ملک کر پاکستان کو آگے لے جانا ہے۔