پاکستان کا مشرق وسطی کی موجودہ صورتحال پر گہری تشویش کا اظہار

ایران اور اسرائیل کے درمیان کشیدگی پر رد عمل دیتے ہوئے ترجمان دفترخارجہ ممتاز زہرا بلوچ نے کہا ہے کہ تمام فریقین تحمل سے کام لیں اور کشیدگی کم کرنے کی طرف بڑھیں۔

مشرق و سطیٰ میں ہونے والے واقعات پر پاکستان نے سخت تحفظات کا اظہار کیا ہے۔ ترجمان دفتر خارجہ کا کہنا ہے کہ پاکستان صورتحال کا تشویش کے ساتھ جائزہ لے رہا ہے۔ پاکستان کئی ماہ سے خطے میں دشمنی روکنے اور غزہ جنگ بندی کے لئے زور دے رہا ہے۔

انھوں نے مزید کہا کہ تازہ واقعات سفارتکاری کی ناکامی کا اظہار ہیں، صورتحال مستحکم کرنے اور امن کی بحالی کی ضرورت ہے۔آج کی پیش رفت سفارت کاری کے ٹوٹنے کے نتائج کو ظاہر کرتی ہے۔ یہاں بھی اقوام متحدہ کی سلامتی کونسل پین الاقوامی امن و سلامتی قائم رکھنے میں ناکام ہوئی ہے۔

واضح رہے کہ ایران نے شام میں قونصل خانے پر اسرائیلی بمباری کے جواب میں اسرائیل پر حملہ کردیا ہے۔ ایران نے اسرائیل پر حملے میں درجنوں ڈرونز اور کروز میزائل استعمال کیے۔

ترجمان دفتر خارجہ کا کہنا ہے کہ پاکستان نے پہلے ہی کہا تھا کہ خطے میں دشمنی کو روکا اور غزہ میں سیزفائرکیا جائے۔