بھارتی اداکار سلمان خان کے گھر کے باہر نامعلوم افراد کی فائرنگ

بھارتی اداکار اور سماجی کارکن سلمان خان کے گھر کے باہر فائرنگ کا واقعہ پیش آیا ہے، جس کے بعد اداکار کے گھر کے باہر سیکیورٹی کو مزید سخت کر دیا گیا ہے۔

بھارتی میڈیا کے مطابق اتوار کے روز اداکار کی رہائشگاہ کے باہر 2 نامعلوم موٹرسائیکل سوار افراد کی جانب سے فائرنگ کی گئی جس میں کوئی جانی نقصان تو نہیں ہوا تاہم واقعے کے بعد علاقے میں خوف و ہراس پھیل گیا۔

میڈیا رپورٹس کے مطابق واقعہ صبح 4 بج کر 51 منٹ پر پیش آیا ہے، ملزمان کی جانب سے پہلے سلمان خان کے گھر کے باہر فائرنگ کی گئی، جس کے بعد گیلکسی اپارٹمنٹس کے پاس 4 فائر کیے گئے۔

ممبئی پولیس کی جانب سے علاقے میں سکیورٹی بڑھا دی ہے، جبکہ واقعے کے بعد تحقیقات کا بھی آغاز کر دیا گیا ہے۔ واقعے کے بعد کرائم برانچ، مقامی پولیس اور فارینزک ٹیموں نے جائے وقوعہ کا دورہ کیا ہے، جبکہ موقع سے گولیوں کے خول قبضے میں لے لیے ہیں۔

واضح رہے جیل میں قید گینگ وار سرغنہ لورینس بشنوئی اور گولڈی برار کی جانب سے متعدد بار سلمان خان کو قتل کرنے کی دھمکی دی گئی ہے۔

جبکہ بھارتی ذرائع کے مطابق یہ حملہ آور انہی دونوں گینگ وار گروپ سے تعلق رکھتے ہیں۔