سپریم کورٹ میں فوجی عدالتوں میں سویلینز کے ٹرائلز کے خلاف اپیلوں پر سماعت 24 اپریل تک ملتوی

اسلام آباد : سپریم کورٹ میں فوجی عدالتوں میں سویلینز کے ٹرائلز کے خلاف اپیلوں پر سماعت (بدھ) 24 اپریل 2024ء کو ہو گی۔

تفصیلات کے مطابق سماعت کے حوالہ سے کیس کے فریقین کو نوٹسز ارسال کر دیئے گئے ہیں۔ سپریم کورٹ کی جانب سے جاری کاز لسٹ کے مطابق جسٹس امین الدین خان کی سربراہی میں 6 رکنی لارجر بینچ 24 اپریل 2024ء کو دن ساڑھے گیارہ بجے کیس پر سماعت کرے گا۔

بینچ میں جسٹس محمد علی مظہر، جسٹس سید حسن اظہر رضوی، جسٹس شاہد وحی، جسٹس مسرت ہلالی اور جسٹس عرفان سعادت خان شامل ہیں۔ واضح رہے کہ سپریم کورٹ نے کیس کی گزشتہ سماعت پر اٹارنی جنرل سے فوجی عدالتوں سے تین سال تک کی سزا پانے والے ملزمان کی تفصیلات طلب کی تھیں اور فیصلوں کی مشروط اجازت دی تھی۔