حادثہ کے ذمہ داران کے خلاف سخت کارروائی کی جائے گی : وفاقی وزیر ریلوے

تفصیلات کے مطابق وفاقی وزیر ریلوے اعظم سواتی  گھوٹکی کے قریب ڈہرکی  پہنچ گئے ، جہاں انہوں  نے جائے حادثہ کا جائزہ لیا    ۔ وزیرریلوے کو  ڈی ایس سکھر نے حادثہ کے حوالے سے   بریفنگ دی۔ ترجمان ریلوے کے مطابق وزیر ریلوے اعظم سواتی نے امدادی کاروائیوں پر اطمینان کا اظہارکیا جبکہ امدادی کاروائیوں میں تیزی کی ہدایات  بھی جاری کیں۔

اس موقع پر  وزیر ریلوے   اعظم خان سواتی نے کہا کہ  یہ ایک بڑا حادثہ ہے، مسافروں کے جاں بحق اور زخمی ہونے پر افسوس ہے، بوگیوں میں پھنسے مسافروں کے ریسکیو کا عمل پایہ تکمیل کے قریب ہے، ٹرین حادثہ کی فوری طور پر ابتدائی رپورٹ پیش کرنے کاحکم  دے دیا ہے ،   حادثہ کے ذمہ داران کے خلاف سخت سے سخت کاروائی کی جائے گی  اور سخت سزادینے کے احکامات جاری کئے  ہیں ۔

وزیر ریلوے نے ٹرین حادثہ پر افسوس کا اظہار کرتے ہوئے کہا کہ  اللہ تعالی مرحومین کے درجات بلند فرمائے اور لواحقین کو صبر جمیل عطا کرے۔

اس سے قبل وزیراعظم عمران خان نے گھوٹکی کے قریب ٹرین حادثے پر اظہار افسوس کرتے ہوئے کہا ٹرین حادثے کی جامع تحقیقات کا حکم دیا اور وزیرریلوے اعظم سواتی کو زخمیوں کو طبی سہولتوں کی فراہمی یقینی بنانےکی ہدایت اور جاں بحق افراد کے لواحقین سےمکمل تعاون کی ہدایت کی ہے۔

واضح رہے کہ ڈہرکی کے قریب  کراچی جانے والی سرسید ایکسپریس ٹریک پرموجود ملت ایکسپریس سے ٹکراگئی، جس کے نتیجے میں 36 سے زائد افراد جاں بحق ہوئے جبکہ متعدد زخمی ہوئے ، جن میں سے کئی زخمیوں کی حالت تشویشناک ہے۔