دبئی لیکس معاملے پر سپریم کورٹ کو نوٹس لینا چاہئے،امیر جماعت اسلامی

امیر جماعت اسلامی حافظ نعیم الرحمٰن نے کہا کہ سپریم کورٹ کے دبئی لیکس کے معاملے پر نوٹس لینا چاہئے۔یہ پاکستان کی بقاء کا مسئلہ ہے لہٰذا میرا مطالبہ ہے کہ الیکشن کمیشن ان سب کو ڈی سیٹ کرے جنہوں نے دبئی لیکس والے اثاثے ظاہر نہیں کئے۔

میڈیا سے گفتگو کرتے ہوئے حافظ نعیم الرحمٰن نے کہا کہ ایک وزیر نے بیان دیا کہ میں نے قانونی کام کیا تو پھر آپ دبئی کے وزیر بن جائیں، یہ لوگوں سے کہتے ہیں کہ پاکستان میں سرمایہ کاری کریں لیکن اپنا سرمایہ باہر کے ملکوں میں لے جاتے ہیں۔

انہوں نے مزیدکہا کہ اب دبئی لیکس کا مسئلہ کیوں نہیں ہے؟ چار دن ہو گئے ہیں بات ہوئی اور ان لوگوں نے معاملہ دبا دیا ۔ جب ہم پائی پائی کے محتاج ہیں تو لوگ ساڑے 3 ہزار ارب روپے لے کر چلے گئے اور وہاں سرمایہ کاری کر دی۔

امیر جماعت اسلامی کا کہنا تھا کہ حکمرانوں نے ظالمانہ قسم کے معاہدوں سے عوام پریشان ہے، ملک میں ایک ایسی انڈیپنڈنٹ پاور پروڈوسر موجود ہے جس نے 28 ارب روپے کمائے لیکن ایک میگاواٹ بجلی پیدا نہیں کی۔ قوم کی جیب میں ڈاکہ ڈال کر ان کو پیسے دیئے گئے کیونکہ معاہدہ یہ ہے کہ آپ بجلی لیں یا نہ لیں وہ عوام سے پیسے چارج کریں گے۔

انہوں نے کہا کہ ہمیں ایسے شکنجے میں کس دیا گیا ہے کہ ہم کیا کریں؟، غریب لوگ کہاں جائیں؟، جس کے پاس پیسے ہیں اور پاکستان میں سرمایہ کاری کرنا چاہتا ہے تو آپ راستے بند کر دیتے ہیں۔