عازمین حج کی حفاظت کیلئے گلوبل پوزیشننگ ٹریکنگ سسٹم کا استعمال کیا جائے گا ، ڈاکٹر شاہد الرحمن

سعودی عرب میں پاکستانی حج مشن مدینہ منورہ اور مکہ مکرمہ کے درمیان سفر کرنے والے عازمین حج کی نقل وحرکت پرنظر رکھنے کیلئے لائیو بس گلوبل پوزیشننگ ٹریکنگ سسٹم کا استعمال کررہا ہے ۔

 مدینہ میں انچارج روانگی سیل ڈاکٹر شاہد الرحمن نے کہا کہ اس ٹریکنگ سسٹم کا مقصد عازمین حج کو سہولت فراہم کرنا ہے اور ان کی حفاظت کرنا ہے ۔ 

ڈاکٹر شاہد الرحمان  نے بتایا کہ اس اقدام کا مقصد عازمین کیلئے مدینہ سے مکہ تک سفر کو آسان بنانا اورمسافروں کو بروقت منزل تک پہنچانا ہے ۔

انہوں نے کہا کہ اس وقت عازمین حج کو مدینہ منورہ سے مکہ مکرمہ لانے کیلئے پچاسی بسیں استعمال کی جارہی ہیں۔انہوں نے کہا براہ راست نگرانی کے اس نظام سے مشن میقات کے مقام ذوالحلیفہ اور نماز وتفریح کیلئے بسوں کے رکنے کی جگہوں سمیت عازمین کے سفر پر نظر رکھ سکے گا ۔

واضح رہےکہ عازمین حج کے حوالے سے تفصیلات بتاتے ہوئے انہوں نے کہا اب تک انیس ہزار ایک سو اٹھارہ پاکستانی عازمین حج مکہ پہنچ چکے ہیں۔