دہشت گردوں کے خلاف کامیاب کارروائیوں پر وزیر اعظم کا جوانوں کو خراج تحسین

وزیراعظم شہبازشریف نے ٹانک، ڈیرہ اسماعیل خان اور خیبر کے اضلاع میں دہشت گردوں کے خلاف کامیاب کارروائی کرنے پر سکیورٹی فورسز کے افسروں اور جوانوں کی تعریف کی ہے۔

آج ایک بیان میں انہوں نے ضلع خیبر کے علاقے باغ میں ایک کارروائی کے دوران جام شہادت نوش کرنے والے پاک فوج کے پانچ جوانوں سپاہی تیمور شہید، سپاہی نادر صغیر شہید، سپاہی محمد یاسین شہید، لانس نائیک سید دانش افکار شہید اور نائیک اشفاق بٹ شہید کو خراج عقیدت پیش کیا۔

مرحومین کے لئے درجات کی بلندی اور لواحقین کے ساتھ اظہار ہمدردی کرتے ہوئے وزیراعظم نے کہا کہ سکیورٹی فورسز نے اپنی جانوں کی پرواہ نہ کرتے ہوئے دہشت گردوں کے خاتمے کیلئے کارروائی کی۔شہبازشریف نے ملک سے دہشت گردی کے مکمل خاتمے تک جنگ جاری رکھنے کا عزم ظاہر کیا۔ انہوں نے کہا کہ پوری قوم دہشت گردی کے خلاف جنگ میں سکیورٹی فورسز کے شانہ بشانہ کھڑی ہے۔